Federasııa basshylyǵy ózgerdi
Qazaqstandyq balýandardyń Tokıo Olımpıadasyndaǵy jáne Norvegııada ótken álem birinshiligindegi sátsizdikterinen keıin grek-rım, erkin jáne áıelder kúresi federasııasynyń basshylyq quramynda birqatar ózgeris boldy.
Qazaqstan kúres túrleri federasııasynyń málimeti boıynsha, grek-rım, erkin jáne áıelder kúresi federasııasynyń prezıdenti bolyp buǵan deıin vıse-prezıdent qyzmetin atqarǵan Erlan Qojasbaı saılandy. Al áıelder kúresi boıynsha erkin kúresten 2006 jylǵy Azııa chempıony Nurjan Qataev, grek-rım kúresi boıynsha Talǵat Jylysbaev, bapkerler men tóreshilerdiń kýratory boıynsha Almaty qalasy sport basqarmasynyń basshysy Rústem Baıseıitov, óńirlik damý baǵyty boıynsha Nur-Sultan qalasynyń «Dene shynyqtyrý jáne sport basqarmasy» MM basshysy Samat Erǵalıev vıse-prezıdenttikke taǵaıyndaldy.
Sonymen qatar elimizdiń dańqty balýany, Azııa chempıonatynyń eki dúrkin jeńimpazy, álem birinshiliginiń bes dúrkin júldegeri Almat Kebispaev grek-rım kúresi quramasynyń úılestirýshisi, 2018 jylǵy Azııa chempıony Ashat Dilmuhametov federasııanyń marketıng baǵytyndaǵy úılestirýshisi, úsh dúrkin Azııa chempıony, álem birinshiliginiń júldegeri Dáýlet Nııazbekov erkin kúres quramasynyń úılestirýshisi boldy.
Al balýandardyń jetistigine tikeleı qatysy bar ulttyq quramanyń bas bapkerler quramynda ázirge ózgeris bola qoıǵan joq.
Ekinshi kezeńde súrindi
Tennısten Qazaqstannyń – birinshi, álemniń 36-raketkasy Aleksandr Býblık Parıjde ótip jatqan júlde qory 2,6 mln eýrodan asatyn ATP 1000 týrnıriniń ekinshi aınalymynda súrindi.
Jerlesimiz týrnırdegi tusaýkeser kezdesýinde álemniń 24-raketkasy, ulybrıtanııalyq Denıel Evanspen kezdesip, úsh settiń qorytyndysy boıynsha 2:6, 7:5, 7:5 nátıjesimen jeńiske jetken edi. О́kinishke qaraı, ekinshi aınalymda álemniń segizinshi, osy dodanyń 6-raketkasy, norvegııalyq Kasper Rýýdtyń osal tusyn taba almady. Norvegııalyq tennısshi 1 saǵat 17 mınýtqa sozylǵan básekede óziniń sheberligi arqasynda otandasymyzdan eki sette 6:4, 6:0 esebimen basym tústi.
Báseke barysynda Býblık 6 eıs jasap, 6 breık-poınttyń ekeýin ǵana paıdalandy. Qarsylasy 2 eıs, 6 breıkke (16 breık-poınt) qol jetkizdi. K.Rýýd jarystyń shırek fınalyna shyǵý úshin argentınalyq Dıego Shvarsman nemese amerıkalyq Markos Gıronnyń birimen talasady. A.Býblık jekeleı syndaǵy jarysty aıaqtaǵanymen, juptyq básekesinde ıspanııalyq Roberto Baýtıstamen birge óner kórsetedi.
Promoýtersiz qaldy
Qazaqstandyq kásipqoı boksshy Batyr Júkembaev (18-1, 14 KO) kanadalyq Eye of The Tiger Management promoýterlik kompanııasymen jumys istemeıtin boldy. Bul týraly boksshynyń ózi málimdedi.
«Kanadada kásipqoı boksshy retinde jolymdy ashqan EOTTM promoýterlik kompanııasyna jáne onyń basshysy Kamıl Estefanǵa alǵys aıtqym keledi. Endigi mansabymdaǵy oń nátıjelerdi kózdeı otyryp, ózara beıbit kelisimmen, qos taraptyń seriktestigi aıaqtaldy. Dese de álem chempıony ataný maqsatym óz kúshinde qala beredi», dep jazdy sportshy áleýmettik jelisindegi paraqshasynda.
Aıta keteıik, Batyr Júkembaev sharshy alańdaǵy sońǵy jekpe-jegin osy jyldyń 30 mamyrynda AQSh-tyń Los-Andjeles qalasynda pýerto-rıkalyq Sabrıel Matıaspen (17-1-0, 17 KO) ótkizip, tehnıkalyq nokaýtpen jeńilip qalǵan edi.