Lexus markaly avtokóliginiń júrgizýshisi Bókeıhan kóshesimen kele jatyp, joldyń júrý bóliginen ótip bara jatqan 24 jastaǵy qyzdy qaǵyp ketken, dep jazady Egemen.kz qalalyq polısııa basqarmasyna silteme jasap.
Qujattaryn tekserý kezinde polısııa qyzmetkerleri 56 jastaǵy júrgizýshiden alkogoldiń ótkir ıisin baıqaǵan. Medısınalyq kýálandyrýǵa sáıkes kólik júrgizýshisiniń mas kúıinde bolǵany anyqtalǵan.
Jol-kólik oqıǵasy saldarynan boıjetken dene jaraqatyn alyp, qalalyq aýrýhanaǵa jetkizildi. Medısınalyq kómek kórsetilgennen keıin boıjetken úıine jiberildi. Atalǵan fakti boıynsha anyqtaý jumystary júrgizilýde.
Dál sol kúni túngi ýaqytta bir kýágerden polısııaǵa «Toıota kamrı» markaly avtokóliginiń ıesi masań kúıinde rólge otyrǵany jaıly habarlama kelip túsken. Atalǵan 25 jastaǵy tártip buzýshyny ustaǵan sát polısııa qyzmetkeriniń beınetirkeý quralyna jazylyp alynǵan. Medısınalyq kýálandyrýǵa sáıkes onyń kólikti jeńil dárejedegi mas kúıinde basqarǵany belgili bolǵan.
Úsh táýliktiń ishinde elordalyq polıseıler tarapynan 5 mas júrgizýshi ustalyp barlyǵy sot aldyndaǵy jaýapqa tartylǵan. QR ÁQBtK-niń 608-babyna sáıkes, kólik quralyn mas kúıinde basqarǵany úshin ákimshilik sottyń sheshimimen tártip buzýshylar 15 táýlik merzimge qamaýǵa alynyp, jeti jyl merzimge júrgizýshi kýáliginen aıyryldy. Avtokólikter kommýnaldyq turaqqa ornalastyryldy.
Nur-Sultan qalasynyń Polısııa departamenti jol qozǵalysy erejelerin buzǵany úshin jaýapkershilikke tartylatyny týraly eskertedi jáne azamattardy belsendi azamattyq ustanym tanytýǵa shaqyrady. Júrgizýshilerdiń zańsyz áreketterin, atap aıtqanda masań kúıinde kólik basqarǵan júrgizýshilerdiń kýágerlerine polısııa nómirine nemese «102» mobıldi qosymshasyna habar berýdi suraıdy.