Ulttyq ekonomıka mınıstri Áset Erǵalıev «Kásipkerlik belsendilikti arttyrý» baǵytyndaǵy atqarylyp jatqan jumystar týraly aıtty, dep jazady Egemen.kz.
«О́z isin ashý úshin, onyń ishinde «Bastaý Bıznes» jobasy sheńberinde jaǵdaı jasaý boıynsha sharalar qabyldanady. Iskerlik baılanystardy keńeıtý maqsatynda sheteldik bıznes-taǵylymdamalar uıymdastyrý kózdeledi. Onymen qosa, jumyssyz júrgenderdi jumyspen qamtý úshin «Túlekterge arnalǵan jastar praktıkasy», «Áleýmettik osal toptarǵa arnalǵan áleýmettik jumys oryndary» sııaqty jobalar, sonymen qatar zeınetker jasyna jetken adamdardy jumysqa ornalastyrý úshin «kúmis jas» jobasy iske asady», dedi Áset Erǵalıev.
Onyń sózinshe, barlyq jobalardy iske asyrýdyń arqasynda jeke kásibin ashatyn adamdar úlesi 1,7 esege artatyn bolady.
«Sýbsıdııalanatyn jumys oryndarynan bólek turaqty jumys oryndaryna jumys isteıtin azamattar úlesi 1,4 ese ósedi. Qarjylyq emes qoldaý sharalaryn alǵan kásipkerlik sýbektileriniń sany 638 myń birlikke jetkizilmek. Qysqa merzimdi kásiptik oqýdan keıin jumysqa ornalastyrý deńgeıi 55-ten 80%-ǵa deıin ósedi», deıdi Ulttyq ekonomıka mınıstri.