Serra-Leone astanasy Frıtaýn qalasynda janarmaı quıylǵan tanker júk kóligimen soqtyǵysty. Jarylys saldarynan júzden asa adam qaza tapty.
Jarylystan buryn janarmaı tógilip, joldyń jan-jaǵyna jaıylǵan. Sonyń saldarynan apatqa jaqyn mańdaǵy adamdar men kólikter túgeldeı otqa oranǵan. Jergilikti buqaralyq aqparat quraldary tankerdiń janynda qatty kúıip ketken múrdelerdiń beınesin kórsetti.
Oqıǵa ornyna barǵannan keıin vıse-prezıdent Mohamed Djýlde Djalloh bul «ulttyq apat» dep málimdedi. Ol zardap shekkender tegin emdeletinin aıtty. Frıtaýn tóńiregindegi aýrýhanalar men densaýlyq ortalyqtaryna shamamen 90-nan astam adam jetkizilgen. Olar qazir em qabyldap jatyr. Naýqastardyń keıbiriniń jaǵdaıy óte aýyr.
Jarylys juma kúni qalanyń shyǵysyndaǵy halyq tyǵyz ornalasqan Vellıngton mańyndaǵy Choithram sýpermarketiniń syrtyndaǵy jol aıryǵynda bolǵan kórinedi.
Serra-Leone ulttyq apattardy basqarý agenttigi (NDMA) tanker mańaıdaǵy janarmaı quıý stansasyna kirgen kezde kólikpen soqtyǵysqanyn habarlady. Agenttiktiń habarlaýynsha, júrgizýshiler janarmaıdyń tógilip jatqanyn baıqap, oqıǵa ornynan alysqa ketýdi eskertken. Biraq adamdar oǵan mán bermeı, tankerden aqqan janarmaıdy quıyp almaqqa umtylady. Sol sátte kólik jarylyp ketken.