Qýǵyn-súrginge ushyraǵandar aqtalýy tıis

Semınardy Saıası qýǵyn-súr­gin qurbandaryn tolyq aq­taý jónindegi memlekettik komıs­sııa­nyń qyzmetin qoldaý jónin­degi jobalyq keńse men Aqtó­be oblysynyń ákimdigi uıymdas­tyr­dy. Oǵan respýblıkanyń bar­lyq oblysynan О́ńirlik ko­mıs­sııa­lar jumys toptary­nyń ókil­deri, memlekettik qyz­met­ker­ler, ǵalymdar, qoǵam qaı­rat­kerleri, mamandar, eriktiler qatysty.

Semınardyń maqsaty – О́ńir­­lik komıssııalardyń maman­­dan­dyrylǵan jumys topta­rynyń se­mınarda talqylanǵan ta­qyryp bo­ıynsha atqarǵan jumystary ­týraly esebin tyńdaý, júrgizilip jat­­qan ǵylymı zertteýler boıyn­sha tájirıbe almasý, óńirlik ko­mıs­­sııalardyń ǵylymı-zertteý ju­­­mysyn jetildirý joldaryn qa­­ras­­tyrý jáne olardyń mem­le­­ket­tik komıssııanyń jumys toptarymen ózara árekettestigin damytý.

Saıası qýǵyn-súrgin qur­ban­daryn tolyq aqtaý jónindegi ob­lystyq komıssııanyń tóraıymy, Aqtóbe oblysy ákiminiń orynbasary Bulbul Eleýsinova kirispe sóz sóı­ledi. Ol semınar taqyryby bo­­ıynsha oblysta atqarylyp jat­qan jumystar jóninde aqparat berdi.

Jıyn barysynda sóz alǵan Saıası qýǵyn-súrgin qurbandaryn tolyq aqtaý jónindegi memlekettik komıssııanyń qyzmetin qoldaý jónindegi jobalyq keńse basshysy Sabyr Qasymov Qazaqstan Táýelsizdik alǵan 30 jyl ishinde Qazaqstannyń bostandyǵy men táýelsizdigi, aýmaqtyq tutastyǵy úshin kúreskenderdi tolyq qu­qyqtyq jáne saıası ońaltý týra­ly arnaıy memlekettik akt qa­byl­damaǵanyn atap ótti.

Qazaqstan Respýblıkasy­nyń 1993 jylǵy 14 sáýirdegi «Jap­paı saıası qýǵyn-súrginder qur­ban­daryn aqtaý týraly» zańynda qýǵyn-súrgin qurbandarynyń bul sanaty múlde atalmaǵan. Degenmen bul qýǵyn-súrgin ýaqyty jaǵy­nan eń uzaq, eń júıeli, eń jasyryn júzege asyrylǵan. О́tken ýa­qyt merzimine qaramastan, Qa­zaq­stannyń bostandyǵy men táýel­sizdigi úshin kúresip qýǵyn-súrginge ushyraǵan halyq, saýatty túrde kúrese bilgen saıası jáne qoǵamdyq uıymdar, qoǵamdyq-saıası, rýhanı, qyzmettik, ǵylymı, mádenı jáne shyǵarmashylyq salalarda qýǵyn-súrginge ushyraǵan tulǵalar aqtalýǵa tıis.

Osyǵan baılanysty jumys to­by jan-jaqty tekserý júrgizip ja­tyr. Atalǵan sanattaǵy barlyq zardap shekkenderdi tolyq saıası-qu­qyqtyq aqtaý jónindegi mem­lekettik komıssııanyń otyrysynda birqatar usynys engizbek.

Máselen, Qazaqstanda Keńes óki­metin kúshtep ornatýǵa qar­sy kúreskenderden bastap, Qazaq­stannyń azattyǵy men táýel­sizdigi jolyndaǵy ult-azattyq kúreske qatysýshylar osy sa­natqa enbek. Sondaı-aq kóp adam shyǵy­nyn ákelgen aǵaıyndyq azamat soǵysy men taptyq qarsylyqty jasandy túrde engizýge qarsy kúreskender de tizimge alynady.

Aımaqtyq qozǵalystardyń kósh­basshylary jáne Alash par­tııasynyń belsendileri, Alashor­da úkimetiniń, Alash áskerı qura­malarynyń músheleri, sondaı-aq olarǵa uıymdastyrýshylyq, qarjylyq jáne materıaldyq kó­mek kórsetken tulǵalar da osy sanatqa qosylmaq.

S.Qasymov Qazaqstannyń múd­­desi, bostandyǵy men táýel­siz­digi úshin tek qazaqtar ǵana emes, osy kúreske qarýly qaqty­ǵys­­tarǵa da  jáne saıası-ıdeo­lo­gııa­lyq maıdanǵa da shyn júrek­­ten qatysqan júzdegen, myń­da­­ǵan orys, ózbek, evreı, ýk­raın, qyrǵyz jáne basqa da ha­lyq­­tar­dyń ókilderi repressııaǵa ushyra­ǵanyn sóz etti. Biraq olar týra­ly biletin adamdar sany óte az. Son­dyq­tan olardyń erligin jańǵyr­tý, esimderin Qazaqstanda máńgi­likke qaldyrý óte mańyzdy jáne bizge mindet ekendigine de basa nazar aýdardy. «Biz qazaq hal­qynyń ulttyq múddeleri men qu­qyq­taryn qorǵaǵan nemese azat­­tyq, táýelsizdik úshin kúreske sha­qyr­ǵan ǵalymdardyń, zertteý­shi­lerdiń, jazýshylardyń, óner qaı­rat­kerleriniń, rejısserlerdiń eń­bekteri men taǵdyrlaryn zert­tep jatyrmyz jáne saıası-quqyq­tyq aqtaýǵa  usynatyn bolamyz jáne olar joǵaryda atalǵan qyz­metteri úshin qýǵyn-súrginniń ár­túrli formalaryna ushyraǵan», dedi S.Qasymov.

Jıyn barysynda Memleket­tik komıssııanyń jumys toby Táýelsizdiktiń 30 jyldyǵyna oraı Qazaqstannyń táýelsizdigi men aýmaqtyq tutastyǵy úshin kúres­kenderdiń erligin kópetnosty hal­qy­myzdyń eń joǵary ulttyq mu­rasy dep tanýdy usyndy.

Elimizdiń barlyq 17 aıma­ǵy­nyń ókilderi – óńirlik komıs­sııa­lar­dyń jumys toptarynyń bas­shy­lary men músheleri de baıandamashylar retinde óz oılaryn bildirdi.