15-19 jeltoqsan kúnderi Túrkııanyń astanasy – Ankarada voleıboldan áıelder arasyndaǵy klýbtyq álem chempıonatynyń jalaýy jelbireıdi.
Osydan bir aı buryn О́skemenniń «Altaıy» Taılandtyń Nakhonratchasım qalasynda ótken Azııa birinshiliginde qarsylas shaq keltirmeı, altynnan alqa taqqan bolatyn. Osy jarqyn jeńisiniń arqasynda Kendi Altaıdyń arýlary jer-jahandaǵy eń úzdik komandalar bas qosatyn básekede baq synaý qurmetine ıe boldy. Jerlesterimizden bólek, bul jarysta Italııanyń «Imoko Volleı» (Eýropa Chempıondary lıgasynyń jeńimpazy), Túrkııanyń «VakyfBanki» (Eýropa Chempıondary lıgasynyń kúmis júldegeri) men «Fenerbahche» (jarysty uıymdastyrýshylar) jáne Brazılııanyń «Mınasy» (2020 jylǵy Latyn Amerıkasy klýbtyq chempıonatynyń jeńimpazy) men «Dentıl-Praıa» (2021 jylǵy Latyn Amerıkasy klýbtyq chempıonatynyń jeńimpazy) klýbtary óner kórsetedi.
Esterińizge sala keteıik, aıtýly doda osydan eki jyl buryn Qytaıdyń Shaosın qalasynda uıymdastyrylǵan edi. Sol jarysta Italııanyń «Imoko Volleıi» top jardy. Fınalda olar Túrkııanyń «Edjzadjıbashıin» 3:1 (22:25, 25:14, 25:19, 25:21) esebimen utty.