Tatarstannyń Qazan qalasynda ústel tennısinen Reseıdiń ashyq komandalyq chempıonatynyń birinshi týry aıaqtaldy.
Qazaqstannyń TTS «Astana» klýby osy jarysta óte keremet óner kórsetti. Quramynda Sarvınoz Mırqadyrova, Záýresh Aqasheva, Ánel Baqyt jáne Angelına Romanovskaıa syndy sheberleri bar jerlesterimiz segiz kezdesýdiń jetýinde jeńiske jetip, birinshi oryndy oljalady. Ekinshi jáne úshinshi satyǵa Qazannyń «Kazanochka» jáne О́zbekstannyń «Hvan Man-Gym» klýby jaıǵasty.
Erler saıysynda elimizdiń eki komandasy baq synady. TT Club Karaganda ujymy bes básekeniń tórteýinde basymdyq tanytyp, ekinshi oryndy ıelendi. Kenshiler qalasy komandasynyń namysyn Alan Qurmanǵalıev, Vladıslav Zaharov jáne Erık Raıter qorǵady. Bul týrnırdiń bas júldesi Barnaýldyń «Altaıyna» buıyrdy. Al TTC «Astana» klýby altynshy satyǵa taban tiredi. Olar úsh oıynda jeńiske jete aldy.