Jumyr jerdegi jurttyń bári juqpaly dertpen kúresip, jantalasyp jatqany belgili. Álemdi ábigerge salǵan indet ártúrli keıipke enip, qurylymy san qubylyp ta úlgerdi. Dúnıeniń túkpir-túkpirindegi ahýal da bir-birine uqsamaıdy. Bir qýantarlyǵy, elimizdegi jaǵdaı turaqtalǵany baıqalady. Oǵan dálel, Úkimet otyrysynda baıandama jasaǵan Densaýlyq saqtaý mınıstri Alekseı Soı sońǵy úsh aıda naýqastar sany 2,3 esege azaıǵanyn aıtty.
Qazaqstanda sońǵy eki aıda aýrýshańdyq 3,4 esege, al ólim-jitim 4 esege tómendedi. Koronavırýs ınfeksııasynyń taralý qarqyny boıynsha «jasyl aımaqta» Shymkent qalasy, Aqtóbe, Atyraý, Almaty, Batys Qazaqstan, Túrkistan, Jambyl, Qyzylorda, Mańǵystaý jáne Shyǵys Qazaqstan oblystary, «sary aımaqta» – Nur-Sultan jáne Almaty qalalary, Aqmola jáne Qaraǵandy oblystary ornalasqan. «Qyzyl aımaqta» Qostanaı, Pavlodar jáne Soltústik Qazaqstan oblystary qalady. Búgingi tańda 8,5 mln adam vaksınanyń birinshi komponentimen, 7,7 mln adam ekinshi komponentimen egildi.
Ekpe alýda elordalyqtar da belsendi. Qalalyq ákimdiktiń habarlaýynsha, qoǵamdyq densaýlyq saqtaý basqarmasynyń qoımasyna Pfizer vaksınasyn saqtaýǵa arnalǵan muzdatqysh jetkizildi.
«О́tken demalys kúnderi -45-ten -80 gradýsqa deıingi temperatýrada jumys isteıtin eki muzdatqysh ákelindi. Vaksına egý kabınetterine arnaıy termokonteınerlermen jetkiziledi. Birinshi kezeńde jasóspirimder men júkti áıelderdi Pfizer vaksınasymen vaksınalaý tek medısınalyq uıymdar janyndaǵy vaksınalaý pýnkterinde josparlanǵanyn atap ótken jón. Pfizer qalanyń medısınalyq mekemelerine túskeni týraly qosymsha habarlanatyn bolady», dedi basqarma ókilderi.
Qala boıynsha barlyǵy 90-nan astam vaksınalaý pýnktteri jumys isteıdi, sondaı-aq eńbek ujymdaryna vaksına salý úshin kóshpeli brıgadalar jumysyn jalǵastyrýda.
«Elorda boıynsha ınfeksııalyq stasıonarlardaǵy naýqastardyń sany – 477. Búginde 10 stasıonar ınfeksııalyq bolyp beıimdelgen, tósektik oryn qýattylyǵy – 1 097. Bir táýlikte 50-60 adam emdelip, úıge shyǵarylady. Ekpeniń 1 komponentin – 454 579 adam, 2 komponentin 419 473 adam aldy», dedi Nur-Sultan qalasynyń qoǵamdyq densaýlyq saqtaý basqarmasynyń ókilderi.
Elordada COVID-19-ǵa qarsy revaksınalaý qarashanyń ekinshi jartysynda bastalady. №15 qalalyq emhananyń JTD bóliminiń meńgerýshisi Gúlnar Syzdyqova býsterlik vaksınany birinshi bolyp azamattardyń qandaı sanattary alatynyn aıtty.
«Koronavırýs ınfeksııasyna qarsy revaksınalaý KVI-men kúreste ımmýnıtetti nyǵaıtý úshin júrgiziledi. Ony birinshi kezekte aýrýǵa beıim azamattar sanaty alady. Sondaı-aq medısına qyzmetkerleri, pedagogter, quqyq qorǵaý organdarynyń qyzmetkerleri vaksınamen qaıta egiledi. Árıne, bári erikti negizde. Sondaı-aq birinshi kezektegi revaksınalaýdan sozylmaly aýrýlary bar adamdar, qart adamdar ótkeni abzal, óıtkeni olar táýekel tobyna kiredi», dedi G.Syzdyqova.
Qalalyq ákimdiktiń málimetinshe, Nur-Sultanda mektep oqýshylarynyń ata-analarymen qaýipsizdik úshin ekpeniń mańyzy týraly áńgimelesý belsendi túrde júrip jatyr. Qala mektepterinde ekpeniń qajettiligi týraly saýaldamalar men jadynamalar taratylady. О́ıtkeni balalar arasynda da koronavırýs juqtyratyndar qatary kóbeıe bastady. Aıta keteıik, bıyl 10 aıda Nur-Sultan qalasynda 13 myńnan astam bala koronavırýs boıynsha em aldy. Olardyń arasynda ólim jaǵdaıy tirkelgen joq.
Elordadaǵy epıdemııalyq ahýaldyń turaqtylyǵyn saqtaý jáne koronavırýstyń odan ári taralýynyń aldyn alý úshin 8 qarashadan bastap saýda, oıyn-saýyq ortalyqtaryna jumys kúnderi de «jasyl» mártebesi bar azamattar ǵana bara alady. Taldaý nátıjesi kórsetkendeı, úı karantınin buzýshylardyń eń kóp sany dál osy saýda, oıyn-saýyq ortalyqtarynda tirkelgen. Oıyn-saýyq ortalyqtary adamdar kóp jınalatyn jáne uzaq ýaqyt bolatyn oryn ekenin eskere otyryp, koronavırýs ınfeksııasynyń taralý qaýpi artady.
Elordalyq «Astana Jastary» jastar resýrstyq ortalyǵy qalalyq Jastar saıasaty máseleleri basqarmasynyń qoldaýymen 5 tamyz ben 30 qarasha aralyǵynda KVI vaksınasynyń eki komponentin alǵan stýdentter arasynda vaksınalaý týraly úzdik beıne-chellendjge arnalǵan baıqaýdy jalǵastyrýda. Baıqaý jastar arasynda COVID-19 taralýyna qarsy kúresý jáne vaksınadan ótýge yntalandyrý, sondaı-aq stýdentter arasynda shyǵarmashylyq klasterdi qoldaý maqsatynda ótkiziledi. Jeńimpazǵa 1 mıllıon teńge, ekinshi oryn ıegeri 300 myń teńge, úshinshi oryn ıegeri 200 myń teńge alady. Sondaı-aq baıqaýǵa qatysýshylar úshin «Arena fitness», Winox fıtnes-zaldarynyń tanymal jelilerinen jáne «Hlebnyı kraı» kompanııasynan yntalandyrý syılyqtary qarastyrylǵan. Konkýrsqa astananyń orta arnaýly (kolledj) jáne joǵary oqý oryndarynyń kámeletke tolǵan stýdentteri qatysa alady, olar osy jyldyń 5 tamyzy men 30 qarashasy aralyǵynda Nur-Sultannyń kez kelgen egý pýnktinde vaksınadan ótip, tıisti qujat alady.