El Táýelsizdiginiń 30 jyldyǵyna oraı 18 jeltoqsanda elordadaǵy Jekpe-Jek sport kesheninde qazaqstandyq boksshylardyń qatysýmen úlken kásipqoı boks keshi uıymdastyrylady. Keshtiń basty jekpe-jeginde Danııar Eleýsinov jartylaı orta salmaqtaǵy IBO beldigi úshin judyryqtasady.
Ázirshe otandasymyzdyń qarsylasy belgisiz. Degenmen qazaqstandyq BAQ ókilderiniń jazýynsha, Eleýsinovke myna úsh boksshynyń biri qarsylas atanýy múmkin. Olar – 32 jastaǵy amerıkalyq Morıs Hýker (27-2-3, 18 KO), 37 jastaǵy Hosesıto Lopes (38-8, 21 KO) jáne 34 jastaǵy Sebastıan Formella (23-2, 11 KO). Úsh boksshynyń úsheýi de buryn óz salmaqtarynyń chempıony bolǵan. Hýker men Lopes jartylaı orta salmaqta WBO jáne WBA (Super) beldigin ıelengen bolsa, Formella orta salmaq dárejesinde IBO tujyrymy boıynsha chempıon atanǵan.
Atalǵan boks keshinde Danııar Eleýsinovten bólek, aýyr salmaqtaǵy Ivan Dychko (10-0, 10 KO), sýper orta salmaqtaǵy Dáýren Eleýsinov (9-1-1, 8 KO), birinshi jartylaı orta salmaq dárejesindegi Janqosh Turarov (24-0, 17 KO) óner kórsetedi. Sonymen qatar jeńil salmaqtaǵy qazaqstandyq Erjan Zalılov pen Eskendir Harsan osy boks keshinde 20 jyldan keıin birinshi ret Qazaqstan chempıony belbeýin sarapqa salady.