Qazaqstandyq kásipqoı boksshy Fırýza Sharıpova (14-1, 8 KO) óziniń kelesi jekpe-jegin 11 jeltoqsanda ótkizetin boldy. Bul kúni otandasymyz jeńil salmaqta álemniń absolıýtti chempıony ırlandııalyq Ketı Teılormen (19-0, 6 KO) kezdesedi.
Jekpe-jekti tikeleı efırde kórsetetin DAZN platformasynyń habarlaýynsha, kezdesý 10 raýndqa josparlanǵan. Aıqas Anglııanyń Lıverpýl qalasynda ótedi. 35 jastaǵy Ketı Teılor – áýesqoı boksta da, kásipqoı boksta da talaı bıikti baǵyndyrǵan tájirıbeli boksshy. 2012 jyly 60 kılo salmaq dárejesinde London Olımpıadasynyń chempıony atanǵan ol bes márte álem birinshiliginde, alty ret Eýropa chempıonatynda qarsylas shydatpaǵan. Sondaı-aq Eýroodaq chempıonattarynda da birneshe ret altyn tuǵyrdan kóringen. 2016 jyldyń qarashasynda kásipqoı boksqa bet burǵan Teılor búginge deıin 19 jekpe-jek ótkizip, barlyǵynda basym túsken. 14-shi jekpe-jeginde óz salmaǵynda álemniń absolıýtti chempıony atanǵan Ketı qatarynan bes kezdesýde belbeýlerin sátti qorǵap kele jatyr. Teılor eń keıingi aıqasyn qyrkúıekte amerıkalyq Djennıfer Hanmen (18-4-1, 1 KO) ótkizip, upaı sanymen jeńiske jetti.
Al 27 jastaǵy Fırýza Sharıpova 2012 jylǵy Qazaqstan birinshiliginiń jeńimpazy, Sary qurlyq chempıonatynyń qola júldegeri. 2016 jyly kásipqoı boksqa aýysqan otandasymyz búginge deıin 14 jekpe-jek ótkizip, onyń 13-inde qarsylastarynan basym túsken. Tek bir kezdesýinde ǵana jeńilgen. Sharıpova sońǵy kezdesýin 12 qyrkúıekte reseılik Lıýbov Belıakovamen ótkizip, tehnıkalyq nokaýtpen jeńgen edi.