Búgin Egemen Qazaqstan gazetiniń redaksııasynda Májilis depýtaty, jazýshy-pýblısıst Saýytbek Abdrahmanovtyń «Suhbat syry» kitabynyń tanystyrylymy ótti, dep habarlaıdy Egemen.kz.
Qazaqstan Respýblıkasy Memlekettik syılyǵynyń laýreaty, altynshy, jetinshi shaqyrylymdaǵy Parlament Májilisiniń depýtaty, fılologııa ǵylymdarynyń doktory, professor Saýytbek Abdrahmanov qarasha aıynyń basynda mereıli 70 jasqa toldy.
Osyǵan oraı ózi eńbek jolyn bastaǵan, 16 jyl biliktilikpen basqarǵan «Egemen Qazaqstan» gazeti redaksııasynyń ujymy kórnekti memleket jáne qoǵam qaıratkeriniń jetpis jastyq mereıtoıyna onyń jýrnalıstik shyǵarmashylyǵynyń qomaqty bir salasy – suhbattardan quralǵan jańa jınaqty tartý etti.
Is sharaǵa memleket jáne qoǵam qaıratkeri Myrzataı Joldasbekov, Qazaqstannyń eńbek sińirgen qaıratkeri Ádil Ahmetov, Memlekettik syılyqtyń laýreattary Álibek Asqarov pen Nesipbek Aıtuly, sondaı-aq belgili jýrnalıst Janbolat Aýpbaev pen Májilis depýtaty Meırambek Tólepbergen bastaǵan ózge de zııaly qaýym ókilderi men tilshiler qatysty.
«Qazaqtyń qaıratkerine, alashtyń ardaqtysyna, jýrnalıstıkanyń jampozyna aınalǵan Saýytbek Abdrahmanovtyń jetpistiń jotasyna shyqqan mereıtoıy uzaq jyldar boıy ózi basqarǵan «Egemen Qazaqstan» gazeti úshin de erekshe sát. Sondyqtan gazette de birneshe maqala jarııaladyq. Budan bólek «Egemen Qazaqstan» serııasy boıynsha «Suhbat syry» atty suhbattar jınaǵy jaryq kórdi», dedi Egemen Qazaqstan respýblıkalyq gazeti AQ Basqarma tóraǵasy Darhan Qydyráli.
Is shara barysynda professor Myrzataı Joldasbekov pen akademık Ádil Ahmetov kitaptyń tusaýkeser rásimin jasady.
Jıynǵa qatysqan qalamgerler Saýytbek Abdrahmanovtyń eńbek joly men shyǵarmashylyǵy jaıynda mazmundy áńgime órbitti. Sonymen qatar jańa jınaqqa engen suhbattar jaıly oılaryn ortaǵa saldy.