О́skemende tennısten jas sportshylar arasyndaǵy halyqaralyq ITF Juniors J3 Kazzinc Open týrnıri óz máresine jetti. Bir qýanarlyǵy, óz elimizde ótken baıraqty dodada qazaqstandyq tennısshilerdiń mereıi ústem boldy.
Qazaqstan tennıs federasııasynyń baspasóz qyzmeti taratqan málimet boıynsha, О́skemendegi týrnırdiń jekeleı jáne juptyq synynda qazaqstandyq qyzdar úzdik shyqty. Jekeleı jarystyń fınalynda Sandýǵash Kenjebaeva men reseılik Elızaveta Masnaıa bas júldeni sarapqa saldy. Jarys barysynda Masnaıa qazaqstandyq apaly-sińlili Arystanbekovalardy jáne Arýjan Saǵyndyqovany joldan taıdyrǵan bolatyn. Ásirese, 3 saǵat 11 mınýtqa sozylǵan jartylaı fınaldyq matchta Asyljan Arystanbekovany jeńgen edi. Al Kenjebaeva jartylaı fınalda otandasy Dana Baıdáýletpen 2 saǵat 41 mınýt oınady. Degenmen sońǵy básekede S.Kenjebaeva E.Masnaıadan 6:3, 6:4 esebimen basym túsip, chempıondyq ataqty jeńip aldy.
Juptyq synda fınalda qazaqstandyq tennısshiler ózara kim myqtyny anyqtady. Osy dodanyń birinshi raketkalary Arýjan Saǵyndyqova men Dana Baıdáýlet Ásem Shoıbek pen Stefanııa Shalahovany 6:1, 6:1 esebimen tize búktirdi.