QR Prezıdenti Qasym-Jomart Toqaev Syrtqy ister mınıstrliginiń keńeıtilgen alqa májilisinde qazirgi pandemııa álemdik saıasat pen ekonomıkaǵa qalaı áser etkenin aıtty, dep habarlaıdy Egemen.kz.
«Indet bastalǵannan beri álemdik saıasat pen ekonomıka túbegeıli ózgeriske ushyrady. Jahandyq shıelenister órship kele jatyr. Bul elimiz úshin betburysty kezeń. Aldymyzda uzaqmerzimdi mindetter tur. Biz Qazaqstannyń halyqaralyq bedelin saqtap, álemdik arenadaǵy rólin kúsheıtýge tıispiz. Osyǵan oraı syrtqy saıası jumys tásilderin qaıta saralap, júıeli sharalar ázirleýmiz kerek. Bul mindetti tabysty oryndasaq, ulttyq dıplomatııa ýaqyt talabyna jáne azamattarymyzdyń suranysyna saı bolady. Eń aldymen, memleketimizdiń múdessin laıyqty qorǵaı alamyz», dedi Qasym-Jomart Toqaev.
Prezıdent Syrtqy ister mınıstrliginiń osyndaı aýqymdy basqosýy sońǵy alty jylda alǵashqy ret ótkizilip jatqanyn eske saldy.
«Sondyqtan biz qordalanǵan túıtkildiń bárin muqııat taldap, aqyldasýymyz kerek», dedi Memleket basshysy.