Air Astana áýe kompanııasynyń baspasóz qyzmeti ushaqqa «bomba» qoıylǵany týraly aqparatqa qatysty málimdeme jasady, dep habarlaıdy Egemen.kz.
«2021 jyldyń 18 qarashasy kúni saǵat 20:45-te Air Astana áýe kompanııasyna kórshiles eldiń aýmaǵy arqyly ótetin áýe baǵdarynda qaýiptiń bar ekendigi týraly habarlama tústi. Anonımdi habarlamada áýe kompanııasynyń ataýy da, reıs nómiri, datasy jáne ýaqyty da kórsetilmegen.
Áýe kompanııasy qaýipsizdik is-sharalaryn shuǵyl kúsheıtip, óziniń barlyq reısteriniń ushyp kelý jáne ushyp ketýi kezinde qosymsha tekserý jumystaryn júrgizdi. Qaýip týraly aqparat dáleldengen joq. Barlyq materıal tıisti is-shara qabyldaý úshin quqyq qorǵaý organdaryna jiberildi», dep atap ótedi áýe kompanııasynyń baspasóz qyzmetinen.
Aıta keteıik, búgin QR Indýstrııa jáne ınfraqurylymdyq damý mınıstrliginiń baspasóz qyzmeti belgisiz adamnyń «Pýlkovo - Nur-Sultan» baǵytyndaǵy ushaqqa bomba qoıylǵanyn habarlaǵany týraly aqparat taratqan bolatyn.