QR Premer-mınıstriniń orynbasary Eraly Toǵjanov sozylmaly búırek aýrýlary bar naýqastar regıstrin qurý jumystary týraly aıtyp berdi, dep habarlaıdy Egemen.kz.
«2022 jyly sozylmaly búırek aýrýy bar naýqastardyń satylary boıynsha regıstrin qurý máselesi pysyqtalýda, bul pasıentterge monıtorıngti kúsheıtýge jáne tıisti sharalar qabyldap, kórsetiletin medısınalyq kómektiń kólemi men sapasyna tıisti taldaý júrgizýge múmkindik beredi. Qarsy kórsetilimderi joq pasıentter transplanttaýdy kútý paraǵynda tur», dep jazdy Eraly Toǵjanov depýtat saýalyna bergen jaýabynda.
Onyń aıtýynsha, búırek transplantasııasyn kútetin pasıentter jyl saıyn artyp keledi (2019 jyly – 2706, 2021 jyldyń 9 aıynda – 3025). Bul rette 2019 jyly – 136, 2020 jyly – 77, 2021 jyldyń 9 aıynda-97 transplanttaý júrgizilgen.
«Transplantasııaǵa pasıentter kezegin tómendetý úshin Qazaqstan Respýblıkasynda 2022-2025 jyldarǵa arnalǵan organ donorlyǵy men transplantologııany damytý tujyrymdamasynda 2022 jyldan bastap árbir oblys ortalyǵynda kópbeıindi stasıonarlar bazasynda óńirlik transplantasııa ortalyqtaryn ashý kózdelgen. Onda tegin medısınalyq kómektiń kepildik berilgen kólemi sheńberinde búırekti aýystyrý boıynsha operasııalar jasaý josparlanyp otyr. Nefrologııalyq beıindegi pasıentterdi medısınalyq ońaltý ambýlatorııalyq deńgeıde aqýyz-energetıkalyq jetispeýshilikti dárimen túzeýden turady. Gemodıalızdegi gıperfosfatemııanyń aldyn alý úshin «Sevelamer« preparatymen tegin qamtylady», dep atap ótti Premer-mınıstrdiń orynbasary.
«Sonymen birge, qazirgi ýaqytta «Salıdat Qaıyrbekova atyndaǵy densaýlyq saqtaýdy damytý ulttyq ǵylymı ortalyǵy» ShJQ RMK «Ketosterıl» preparatyn qazaqstandyq ulttyq dárilik formýlıarǵa engizý jóninde kásibı saraptama júrgizip, keıinnen preparatty ambýlatorııalyq deńgeıde tegin beretin dárilik zattar tizbesine engizedi», dedi ol.