Aralas jekpe-jek álemindegi eń beldi uıym – UFC-de kúsh synasyp júrgen qazaqtyń qaısar uly Shavqat Rahmonov óziniń kelesi kezdesýin aldaǵy jyldyń 5 aqpanynda Gaıananyń ókili Karlston Harrıske qarsy ótkizedi. Qazirgi kezde kóptegen BAQ ókilderi osy báseke týraly jarysa jazýda. Al sol Karlston jaıynda biz ne bilemiz?
Karlston Harrıs 1987 jyldyń 9 shildesinde Ońtústik Amerıka qurlyǵynyń soltústik-shyǵysynda ornalasqan Gaıana dep atalatyn shaǵyn ǵana elde dúnıege keldi. Jastaıynan aralas jekpe-jekpen shuǵyldanǵan onyń kásipqoılar arasyndaǵy alǵashqy qadamy asa sátti bolmady. Bastapqy úsh básekeniń ekeýinde Karlston jeńilis tapty. Atap aıtsaq, 2011 jyldyń qońyr kúzinde brazılııalyq Chrıstıano Markesten jáne 2012 jyldyń kókteminde Fernando Brýnodan upaı sanymen utyldy. Esesine odan keıin alty birdeı kezdesýde qarsylastaryn oısyrata utyp, kópshilik nazaryna ilikti.
О́ziniń sporttyq karerasynda Harrıs 21 ret oktagonǵa shyǵyp, 17 márte jeńis toıyn toılady. Toǵyz básekeni merziminen buryn aıaqtady. Tórt jeńilistiń úsheýinde upaı sanymen utylsa, bir ret tehnıkalyq nokaýt tirkeldi. Áý basta túrli promoýshenderde óner kórsetken ol bıylǵy jyldan bastap UFC-de kúsh synasýda. Bul rette eki báseke ótkizip, ekeýinde de mereıi ústem boldy. Gaıanalyq sportshy 8 mamyrda amerıkalyq Krıstıan Agılerany qylqyndyryp tastasa, 18 qyrkúıekte AQSh-tyń taǵy bir ókili Impa Kasanganaıdy esinen tandyrdy. Bul jekpe-jektiń ekeýi de birinshi raýndtarda aıaqtaldy. Osylaısha, Karlston qatarynan besinshi kezdesýin óz paıdasyna sheshti.
Al Shavqat Rahmonovtyń júrip ótken joly jankúıerlerdiń kóz aldynda. 27 jastaǵy qandasymyz 2014 jyldan beri osy sport túrin serik etip júr. Sol aralyqta 14 ret aıqas alańyna shyǵyp, barlyq básekeni aıqyn basymdyqpen aıaqtady. Kezinde ol M-1 Global nusqasy boıynsha chempıondyq ataqty ıelense, sońǵy eki jekpe-jegin UFC-de ótkizip, eki retinde de qarsylastaryn tyrp etkizbeı utty.