Birikken Arab Ámirlikteriniń Dýbaı qalasynda karateden álem chempıonaty óz máresine jetti. Erler men áıelderdiń jekelegen saıysyn Qazaqstannyń ulttyq qurama komandasynyń músheleri qos qola medalmen qorytyndylady.
Qazaqstanda karatege degen qyzyǵýshylyq qaı kezde de erekshe bolatyn. Respýblıkamyzdyń ár aımaǵynda esikterin aıqara ashqan úıirmelerge balalar men jetkinshekterdiń, jastar men eresekterdiń kóptep bas suǵýy joǵaryda aıtylǵan sózimizdiń aıqyn dáleli. Buqaralyq sport bar jerde nátıjeniń de bolatyny belgili ǵoı. Sonyń nátıjesinde jerlesterimiz asa iri halyqaralyq jarystardan únemi oljamen oralyp júr. Al Olımpııa oıyndarynyń baǵdarlamasyna enip, karateshilerimiz Tokıo tórinde kúsh synasý qurmetine ıe bolǵannan soń sporttyń bul túrine degen qyzyǵýshylyq odan ári arta tústi. Osydan úsh aıdan asa ýaqyt buryn Japonııanyń astanasynda ótken jarysta Darhan Asádilov pen Sofııa Berýlseva qola medaldi ıelenip, kók baıraǵymyzdy bıikte jelbiretkende barsha qazaq jankúıerleri qýanysh pen shattyqqa bólengen edi.
Keshe ǵana jer-jahannyń eń myqty karateshileri Dýbaıda bas qosty. Sol jarysta 68 kılo salmaqta synǵa túsken Tokıo Olımpıadasynyń qola júldegeri Sofııa Berýlseva úshinshi orynǵa taban tiredi. Sheshýshi tusta ol serbııalyq Ivana Perovıchti san soqtyrdy. 75 kılo salmaqta kúsh synasqan Nurqanat Ájihanov ta dál sol mejeden kórindi. Qola medal úshin básekede 20 jastaǵy qandasymyz Belgııanyń betkeustar sportshysynan basym tústi. Sol sekildi Móldir Jańbyrbaı (50 kılo) men Qaısar Alpysbaıdyń da (60 kılo) jeńis tuǵyryna kóterilýine jaqsy múmkindikteri boldy. О́kinishke qaraı, biri Ýkraına, ekinshisi Marokkonyń ókiline ese jiberip, besinshi orynda qalyp qoıdy.