Búgin, Aqordada Qasym-Jomart Toqaev pen Shavkat Mırzııoev Qazaqstan Respýblıkasy men О́zbekstan Respýblıkasy arasyndaǵy odaqtastyq baılanystar týraly Deklarasııaǵa qol qoıdy, dep habarlaıdy Egemen.kz.
«Búgin biz memleketaralyq qatynastardyń mártebesin odaqtastyq deńgeıine deıin kóterýge ýaǵdalastyq. Jańa ǵana osy másele boıynsha pikir almasyp, munyń elderimiz arasyndaǵy múldem jańa sapaly deńgeı ekenin atap óttik. Árıne, odaqtastyq qatynastar memleketterimizge erekshe mindet júkteıdi. Men memleketaralyq keńes qurý jóninde usynys aıttym. Osy keńes aıasynda biz qajetsiz resmılikten tys, iskerlik negizde jıi bas qosa alamyz», dedi Qazaqstan Prezıdenti.
Al О́zbekstan Prezıdenti eki el arasyndaǵy ornatylǵan jaqyn ári baýyrlastyq baılanystardy joǵary baǵalady.
«Biz kóp qyrly yntymaqtastyǵymyzdyń ózekti máseleleri boıynsha múddelerimiz ben ustanymdarymyzdyń ortaq ekenin taǵy da dáleldedik. Elderimiz arasynda ornatylǵan jaqyn ári baýyrlastyq baılanystarymyzdy joǵary baǵalaımyz. Jańa ǵana Qasym-Jomart Kemeluly halyqtarymyzdyń osy saparǵa rızashylyq tanytyp jatqanyn aıtty. Shyn máninde, shekara mańyndaǵy eki eldiń de turǵyndary qatty qýanady. Sebebi biz jıi kezdesken saıyn ózara qatynastarymyz jaqsara túsedi. Mashına jasaý, energetıka, elektrotehnıka, hımııa, jeńil ónerkásip, bankter jáne basqa da salardaǵy kooperasııa boıynsha sátti shyqqan jobalarymyz bar», dedi О́zbekstan Prezıdenti.
Eske salaıyq, ekijaqty kelissózder qorytyndysy boıynsha odaqtastyq baılanystar týraly Deklarasııadan bólek, resmı delegasııalardyń músheleri birqatar qujatqa qol qoıdy.