Qazaqstandyq tennısshi Zara Dárken Eýropa tennıs qaýymdastyǵynyń sheshimi boıynsha 2021 jyldyń úzdik sheteldik oıynshysy atandy. Ol bul ataqty 14 jasqa deıingi jasóspirimder arasyndaǵy jetken jetistiginiń arqasynda jeńip aldy.
Aqtóbe oblysynyń túlegi Zara Dárken bıylǵy maýsymda birtalaı tabysqa qol jetkizip, álemdik reıtıngte úzdik 20 tennısshiniń qataryna kirdi. Otandasymyz osy jylǵy halyqaralyq týrnırlerdiń jekeleı jáne juptyq syndarynda bir-bir márte jeńimpaz atandy. Úsh márte fınalǵa deıin jetti.
«Jyldyń úzdik oıynshysy atanǵanyma qýanyshtymyn. Bul – men úshin joǵary baǵa. Jyl boıy jarystarda bar kúshimdi saldym. Maǵan úlken qoldaý kórsetkeni úshin bapkerlerim men Qazaqstan tennıs federasııasyna alǵysymdy aıtamyn. Kelesi jyly da bıikten kórinýge tyrysamyn», deıdi Zara Dárken.