Senat Tóraǵasy Máýlen Áshimbaev jumys saparymen Mańǵystaý oblysyna baryp, Táýelsizdiktiń 30 jyldyǵyna arnalǵan saltanatty is-shara aıasynda memlekettik nagradalardy tapsyrý rásimine qatysty, dep habarlaıdy Egemen.kz.
Mańǵystaý turǵyndaryn aıtýly merekemen quttyqtaǵan Máýlen Áshimbaev Tuńǵysh Prezıdent – Elbasy Nursultan Nazarbaevtyń basshylyǵymen Táýelsizdiktiń 30 jylynda qol jetkizgen mańyzdy jetistikterge toqtalyp, osy jyldar ishinde Qazaqstan táýelsiz memleket retinde tolyq qalyptasyp, halyqaralyq qaýymdastyqtyń bedeldi ári yqpaldy múshesine aınalǵanyn tilge tıek etti.
«Elbasynyń bastamasymen biz Semeı ıadrolyq synaq polıgonyn jaýyp, Keńes Odaǵynan mura bolyp qalǵan ıadrolyq arsenaldan azat boldyq. Bul bizdiń jahandyq qaýipsizdik pen beıbitshilik ustanymdaryna berik ekenimizdi kórsetip, álem elderiniń Qazaqstanǵa degen senimin kúsheıte tústi. Qazaqstan halyqaralyq bastamalardy da iske asyrýǵa belsendi qatysyp, bedeldi uıymdarǵa tóraǵalyq etti», dedi Máýlen Áshimbaev quttyqtaý sózinde.
Ol 30 jyldyń ishinde elimizdiń barlyq óńiri, onyń ishinde Mańǵystaý oblysy da qarqyndy damyǵanyn aıtty.
«Mańǵystaý oblysy elimizdiń damýynda erekshe oryn alady. Munda 30 jylda birqatar iri jáne orta kásiporyndar boı kóterdi. Sonyń arqasynda myńdaǵan jumys orny ashyldy. Memleket temirjol jelileri men avto joldar salyp, teńiz portyn damytty. Sońǵy jyldary Mańǵystaýda týrızm salasy da qarqyndy damyp keledi», dedi Senat Tóraǵasy.
Sonymen qatar ol Memleket basshysynyń tapsyrmasymen elimizde júrgizilip kele jatqan saıası, ekonomıkalyq jáne áleýmettik reformalar jaıynda sóz qozǵady. Prezıdent Qasym-Jomart Toqaevtyń elimizdi jańǵyrtý baǵdary aıasynda óńirlerdi damytý jáne aımaqtardaǵy máselelerdi sheshý negizgi basymdyqtardyń biri ekenin jetkizdi.
«Mańǵystaý óńiri úshin ózekti máselelerdiń biri - sapaly aýyz sýmen qamtamasyz etý. Prezıdentimiz 2025 jylǵa deıin qalalar men aýyldarda aýyz sý máselesin sheshýdi tapsyrdy. Soǵan baılanysty bekitilgen arnaıy Ulttyq joba aıasynda bul baǵytta Mańǵystaý oblysynda da aıtarlyqtaı jumys atqarylady», dedi Senat Tóraǵasy.
О́z sózinde oblys ákimi Nurlan Noǵaev Táýelsizdik alǵaly óńirdiń áleýmettik-ekonomıkalyq damý kórsetkishterine toqtala ketti.
«Tuńǵysh Prezıdentimiz Nursultan Ábishuly Nazarbaetyń qajyr-qaıratynyń arqasynda elimiz ósip-órkendedi. Ol táýelsiz Qazaqstannyń berik irgetasyn qalap, elimizdiń belsendi damý baǵdaryn aıqyndap berdi. Qazirgi tańda Prezıdentimiz Elbasynyń syndarly saıasatynyń sabaqtastyǵyn saqtaı otyryp, kózdegen maqsattarǵa jetý joldaryn belgiledi. Biz qashanda ótkenge qurmetpen, keleshekke nyq senimmen qaraǵan halyqpyz», dedi ol óz sózinde.
Saltanatty jıyn barysynda Senat Spıkeri Memleket basshysynyń atynan elimizdiń jáne óńirdiń damýyna eleýli úles qosqan mańǵystaýlyqtarǵa memlekettik nagradalardy tapsyrdy.
«О́ńirlerdi damytý máselesi, onyń ishinde Mańǵystaýdy órkendetý Prezıdentimizdiń tikeleı baqylaýynda. Bıyl qyrkúıekte Memleket basshysy oblystyń áleýmettik-ekonomıkalyq damýy jóninde arnaıy keńes ótkizdi. Osyndaı naqty sharalardyń arqasynda Mańǵystaý óńiri aldaǵy ýaqytta damýdyń jańa deńgeıine kóteriledi dep senemiz», dedi Máýlen Áshimbaev.
Sondaı-aq Senat Tóraǵasy jumys sapary aıasynda Aqtaý qalasyndaǵy onkologııalyq dıspanserge arnaıy baryp, dárigerler men medısına qyzmetkerlerimen kezdesti. Odan bólek, «Halyq Arena» sport kesheniniń jumysymen de tanysty.