Táýelsizdiktiń 30 jyldyq merekesi tanymdyq, taǵylymdyq istermen de el esinde qalady. Shymkent qalasynda mereke qarsańynda qos birdeı eskertkish ashyldy. Qala ákimdiginiń qoldaýymen qoǵam qaıratkeri, ǵalym-etnograf О́zbekáli Jánibekovtiń kompozısııalyq músini ashylyp, «Dara» atty fılmniń tusaýkeseri ótti.
Is-sharaǵa qala ákimi Murat Áıtenov, máslıhat hatshysy Bahadyr Narymbetov, halyqaralyq «Alash» ádebı syılyǵynyń laýreaty, jazýshy Marhabat Baıǵut, «Parasat» ordeniniń ıegeri Hanbıbi Esenqaraqyzy, qoǵam qaıratkeriniń urpaqtary men ǵalymdar, taǵy basqa zııaly qaýym ókilderi qatysty.
Kompozısııalyq músinniń qala ortalyǵynda boı kóterýine yqpal etken qala ákimi Murat Áıtenov quttyqtaý sóz sóılep, is-sharanyń mańyzdylyǵyna toqtaldy. «Memleket jáne qoǵam qaıratkeri О́zbekáli Jánibekovtiń ult rýhanııatyn kóterýdegi orny aıryqsha. Ǵalym-etnograf Mádenıet mınıstrliginde jaýapty qyzmet atqarǵan jyldary elimizde 400-ge jýyq arheologııalyq nysan qalpyna keltirilgenin jaqsy bilemiz. Tarıhymyzdy tanyp, rýhanııatymyzdy bilýge úlken ózgerister jasaldy. Bul О́zbekáli Jánibekovtiń ult qaıratkeri, otanshyl azamat retindegi tulǵasyn kórsetedi. Memleketimizdiń mańyzdy tarıhı belesi – Táýelsizdigimizdiń 30 jyldyǵy qarsańynda ashylǵan bul eskertkish búgingi urpaqtyń ult azamatyna kórsetken zor qurmeti dep bilemin», dedi qala ákimi. Shymkent qalasynyń Ortalyq saıabaǵyna ornatylǵan shaǵyn sáýlet músini О́.Jánibekovtiń 90 jyldyq mereıtoıyna arnalyp otyr. Sondaı-aq qalanyń «Ádet-ǵuryp jáne salt-dástúr ortalyǵynda» qoǵam qaıratkeriniń ómir jolyn baıandaıtyn «Dara» atty derekti fılmniń tusaýy kesildi. Fılmde qaıratkerdiń ómirlik pozısııasy, ulttyq ıdeologııanyń negizin qalaýdaǵy oı-pikir ustanymy, qazaqtyń ómir-salty men bolmys-bitimi, dúnıetanymyn túbegeıli zerttep, qaıta jańǵyrtý jolyndaǵy izdenisteri, kóptegen eńbekteri saralanady.
Sondaı-aq bul kúni Qazaq teatrynyń tuńǵysh rejısseri Jumat Shanınge arnalǵan eskertkish ashyldy. Shymkent teatry Jumat Shanın esimin 1972 jyly ıelendi. Araǵa 50 jyl salyp, teatr aldyna qaıratkerdiń eńseli eskertkishi tuǵyrǵa qondy. «Qazaq teatr óneriniń ustazy bolǵan tulǵanyń ǵıbratty ǵumyry men mol murasy – halqymyzdyń asyl qazynasy. Jumat Shanınge qurmet kórsetý arqyly biz mádenıet qaıratkerlerine qurmet kórsetemiz. Ult tarıhyndaǵy alǵashqy kásibı teatr mamanynyń ómirlik tanymy – óskeleń urpaqtyń boı túzer baǵyty bolatynyna senimdimin», dedi qala ákimi eskertkishtiń ashylý saltanatynda. Jumat Shanın atyndaǵy akademııalyq qazaq drama teatry aldyna ornatylǵan eskertkishtiń bıiktigi tuǵyrymen qosqanda 5 metrge jýyqtaıdy. Avtory – Mádenıet qaıratkeri, Sýretshiler odaǵynyń múshesi Ábdýahat Muratbaev.
ShYMKENT