Memleket basshysy Qasym-Jomart Toqaev M. V. Lomonosov atyndaǵy Máskeý memlekettik ýnıversıtetiniń Qazaqstan fılıalynyń 20 jyldyǵyna quttyqtaý lebizin joldady, dep habarlaıdy Egemen.kz.
Prezıdent quttyqtaýyn Qazaqstan Respýblıkasynyń Memlekettik hatshysy Qyrymbek Kósherbaev oqyp berdi.
«Qurmetti jıyn qatysýshylary, sizderdi M. V. Lomonosov atyndaǵy Máskeý memlekettik ýnıversıtetiniń Qazaqstan fılıalynyń 20 jyldyǵymen quttyqtaımyn. Aıtýly mereıtoı halqymyz úshin tarıhı mańyzy bar Táýelsizdiktiń 30 jyldyǵymen tuspa-tus kelip otyr. Zamanaýı bilim berý júıesiniń tıimdiligi biz júrip ótken úlken joldyń basty jetistikteriniń biri boldy. MMÝ fılıaly eki myńnan astam joǵary bilikti mamandardy daıarlap, otandyq ekonomıkanyń, bilim men ǵylymnyń qalyptasýy men damýyna eleýli úles qosty. Fılıal qyzmeti Qazaqstan men Reseıdiń jemisti gýmanıtarlyq yntymaqtastyǵynyń jarqyn úlgisi bolyp sanalady», deıdi Prezıdent.
Memleket basshysy el Úkimeti M. V. Lomonosov atyndaǵy MMÝ fılıalyna jańa ǵımarat berýdi uıǵarǵanyn atap ótti.
«Meniń tapsyrmammen Úkimet fılıalǵa aýdany 13 myń sharshy metrden astam ǵımarat bóletinin atap ótken jón jáne Qazaqstan úshin basym mamandyqtar boıynsha joǵary bilikti kadrlar daıarlaý úshin tizim keńeıtiledi dep úmittenemin. Bul oqý orny qos el arasyndaǵy dostyq pen seriktestikti odan ári nyǵaıtýǵa, qazaqstandyq bilim berýdiń sapasy men básekege qabilettiligin arttyrýǵa yqpal eterine senimdimin. Saltanatty jıynǵa qatysýshylarǵa shyǵarmashylyq tabys, densaýlyq jáne amandyq tileımin!», dedi Prezıdent Qasym-Jomart Toqaev.
Aıta keteıik, M. V. Lomonosov atyndaǵy MMÝ Qazaqstan fılıaly QR Tuńǵysh Prezıdenti - Elbasy Nursultan Nazarbaevtyń bastamasymen jáne RF prezıdenti Vladımır Pýtınniń qoldaýymen qurylǵan. 2000 jylǵy 9 qazanda Reseı Federasııasynyń Prezıdenti V.V. Pýtınniń Qazaqstan Respýblıkasyna jasaǵan memlekettik saparynda MMÝ rektory, akademık V.A. Sadovnıchıı men QR Bilim jáne ǵylym mınıstri Q.E.Kósherbaev Astana qalasynda L.N.Gýmılev atyndaǵy Eýrazııalyq ulttyq ýnıversıtettiń bazasynda M.V. Lomonosov atyndaǵy Máskeý memlekettik ýnıversıtetiniń Qazaqstan fılıalyn qurý týraly hattamaǵa qol qoıǵan bolatyn.