Qasym-Jomart Toqaevqa elimizdiń bıylǵy 11 aıdaǵy áleýmettik-ekonomıkalyq damýy jáne azyq-túlik qaýipsizdigin qamtamasyz etý sharalary, ınflıasııamen kúres, sanıtarlyq-epıdemıologııalyq ahýal jóninde esep berildi, dep jazady Egemen.kz Aqordaǵa silteme jasap.
Asqar Mamın Qazaqstannyń ekonomıkasy pandemııa jaǵdaıyna sátti beıimdelip, ekonomıkalyq ósimniń qarqyndy damyp kele jatqanyn aıtty. 11 aıdyń qorytyndysy boıynsha IJО́ 3,8 paıyzǵa artqan.
Prezıdentke bıylǵy qańtar-qazan aılary aralyǵyndaǵy syrtqy saýda aınalymynyń kórsetkishteri týraly málimet berildi. Premer-Mınıstrdiń málimetine sáıkes syrtqy saýda kólemi 82,2 mıllıard dollardy qurady. Bul byltyrǵy osy kezeńdegi kórsetkishpen salystyrǵanda 14,1 paıyz artyq. Sonymen qatar eksporttyń kólemi 23,5 paıyzǵa kóbeıip, 49,1 mıllıard dollarǵa deıin jetken. Al óńdelgen taýarlardyń eksporty 24,4 paıyzǵa artqan. Saýda teńgerimi 16 mıllıard dollarǵa jetken.
Memleket basshysyna azyq-túlik qaýipsizdigin qamtamasyz etý, áleýmettik mańyzy bar azyq-túliktiń baǵasyn turaqtandyrý, Inflıasııaǵa qarsy is-qımyldyń keshendi sharalaryn júzege asyrý jóninde baıandaldy.
Sonymen qatar Qasym-Jomart Toqaevqa elimizdegi sanıtarlyq-epıdemıologııalyq ahýal, sonyń ishinde halyqqa vaksına salý jumystarynyń qarqyny týraly málimet berildi.
Asqar Mamın Prezıdentke syrtqy jáne ishki ınvestısııalardy tartý isin kúsheıtýge, shaǵyn jáne orta bıznestiń áleýetin arttyrýǵa, óńirlerdi damytýǵa, óńdeý sektorynyń ósimi esebinen ekonomıkanyń qurylymdaryn odan ári ártaraptandyrýǵa baǵyttalǵan sharalardyń júzege asyrylý barysy týraly aıtty.