Elimizdiń bilim-ǵylym, óner jolynda eńbek etip júrgen qyzmetkerler qazaqstandyqtardy el Táýelsizdiginiń 30 jyldyǵymen quttyqtady, dep habarlaıdy Egemen.kz.
«Táýelsizdik alyp, týymyzdy tigip, el bolǵanymyzǵa 30 jyl. Bul – uly toı, ulttyń, eldiń baqyty. Osy uly kúndi ata-babamyz, keshegi Alash arystary, ultyn súıgen uldar qanshama ǵasyr kútti. Osy jolda qanshama qan, kóz jasy tógildi. Búgin mine Nur-Sultan qalasynyń tórine, búkil qazaq halqyna, qazaqstandyqtarǵa sálem joldap, osynaý uly merekemen quttyqtaǵym keledi. Keler jyly elordanyń arqa tórine kóshkenine 25 jyl tolmaq. Bul eki toıdy bólip-jarýǵa bolmaıdy. Ekeýi de uly toı.
Bul bizdiń ortaq qýanyshymyz, eldik muratymyzǵa jetkendigimizdiń belgisi. 30 jyl beker ketken joq. Osy aralyqta úlken jetistikterge jettik. Osy qýanyshpen, jeńispen qalyń eldi quttyqtaǵym keledi», dedi aqyn, Memlekettik syılyq ıegeri Nesipbek Aıtuly.
О́z kezeginde L.N. Gýmılev atyndaǵy EUÝ rektory, Nur-Sultan qalalyq máslıhatynyń depýtaty Erlan Sydyqov egemendiktiń el damýyndaǵy mańyzyna toqtalyp ótti.
«Asa qymbatty qazaqstandyqtar, sizderdi kele jatqan eń ulyq, qasıetti mereke – Táýelsizdigimizdiń 30 jyldyq merekesimen shyn júrekten quttyqtaımyn! Az ýaqyttyń ishinde saryarqanyń tórinen qala turǵyzyp, tórtkúl dúnıege elimizdi baıan etti, aıan etti. Bul Tuńǵysh Prezıdentimizdiń arqasy ekenin aıtýymyz kerek. Shekara shegendeldi, tarıh túgendeldi, rýhymyz kúsheıip jatqan jaǵdaıymyz bar. Al endi saryarqanyń tórinde astanamyz – Nur-Sultan qalasy boı kótergen bolsa, sol astanamyzdyń dál ortasynan EUÝ oryn aldy. Az ýaqyttyń ishinde oqý ornymyz álemdik dárejede úlken ornyn alyp, ósip keledi. Osynyń bári az ýaqytta qoljetken tabysymyz. Tabysymyzdy kúsheıte bereıik! Qazaqstan máńgi jasaı bersin», dedi L.N. Gýmılev atyndaǵy EUÝ rektory, Nur-Sultan qalalyq máslıhatynyń depýtaty Erlan Sydyqov.
Al aıtysker aqyn Ásem Erejeqyzy egemendik jolynda Alash arystary ózin qurban etkenin tilge tıek etti.
«Asa qadirli, qazaq eliniń azamattary, barshańyzdy el Táýelsizdiginiń 30 jyldyǵymen shyn júrekten quttyqtaımyn! Ata-babalarymyz ańsaǵan, Alash arystary osy jolda ózin qurban etken aıaýly azattyǵymyz máńgi bolsyn! Tatýlyq pen birlik negizinde qurylǵan memleketimizdiń saıası-ekonomıkalyq kúsh-qýaty artyp, álemniń ozyq memleketteriniń sapynda kóriný násip bolǵaı! Elimizdiń irgesi aman bolyp, Uly dala tósinde máńgilik beıbitshilik saltanat qursyn!» dedi aıtysker aqyn Ásem Erejeqyzy.
Akter Dáýren Serǵazın táýelsizdik jyldary mádenıet salasyndaǵy jetistikterge toqtalyp ótti.
«Qazaqstan Respýblıkasy Táýelsizdiginiń 30 jyldyǵy qutty bolsyn! Bárimiz siz-biz bolyp ata-babamyzdyń armandaryna arqaý etip, salyp ketken sara jolyn eske alyp, kóptegen jetistikke jettik. Áli de talaı asýdy baǵyndyryp, kók týymyzdaǵy altyn qyrandaı bıikte sózsiz samǵarmyz. Sońǵy jyldary elimizde kóptegen mádenı oshaqtar, ásirese teatrlar ashyldy. Teatrdyń ashylýy – mádenıettiń órkendeýi, memlekettiń damýy. Sol sebepti osynaý keń baıtaq jerde baqytty ǵumyr keship jatyrmyn. Birligimiz myǵym bolsyn! Jaqsy kúnderimiz kóp bolsyn!», dedi «Jastar» teatrynyń akteri, QR eńbek sińirgen qaıratkeri Dáýren Serǵazın.