Elordada Qazaqstan Táýelsizdiginiń 30 jyldyǵyna oraı ońaltý ortalyǵy ashyldy. Ortalyqta erekshe qajettilikteri bar balalar mamandardyń sapaly qyzmetterin tegin ala alady, dep habarlaıdy Egemen.kz.
Ortalyqtyń ashylýyna Nur-Sultan qalasy ákiminiń orynbasary Ashat Oralov qatysty.
«Táýelsizdik kúni qutty bolsyn! Ata-analar men balalardy búgingi merekemen shyn júrekten quttyqtaımyn! 30 jyl ishinde biz úlken jetistikterge jettik. Biraq ózekti máseleler áli de kóp. Sondyqtan biz onyń da sheshimin tabý úshin birigip jumys istegimiz keledi. Árbir januıaǵa zor densaýlyq, amandyq jáne tabys tileımin!», dedi A.Oralov.
Aıta keteıik, jobany elorda ákimdigi men «Baqytty shańyraq» qory júzege asyrdy.«Teń qoǵam» ortalyǵy múgedek balalary bar otbasylar úshin arnaıy ashyldy. Jańa týǵan balalar men 18 jasqa deıingi balalarǵa kómektesemiz. Munda bilikti mamandar bar. Ortalyqta segiz assıstent jumys isteıdi. Olar ár otbasynyń jaǵdaıyn biledi jáne olarǵa kómektesedi», dedi «Teń qoǵam» ortalyǵynyń jetekshisi Saltanat Raqysheva.
Ortalyqty ashýdyń mańyzdylyǵyn ata-analar da atap ótti. Bul ortalyq kópshilik úshin úlken kómek bolyp sanalady, óıtkeni munda balalar logopedtermen, psıhologtarmen tegin jumys isteıdi, saýyqtyrý massajyn, emdik dene shynyqtyrýdy alady jáne montessorı ádistemesi boıynsha oqytylady.
Elordada ońaltý ortalyqtarynyń jelisi aıtarlyqtaı keńeıtildi. Bıyl jazda kórý qabileti buzylǵan balalarǵa arnalǵan mamandandyrylǵan balabaqsha ashyldy. Qala aýdandarynda 29 «úıdegi dáriger» nysany ashyldy, ınvataksı sany 2 ese artty.
Jańa úılerdiń birinshi qabatynda «qadamdyq qoljetimdilik» qaǵıdaty boıynsha balalarǵa arnalǵan shaǵyn ortalyqtar, ońaltý ortalyqtary, balabaqshalar, medısınalyq ortalyqtar jáne t.b. ashylady. Budan basqa, ótken jyly elordada BSP, aýtızm, daýn sındromy jáne t.b. dıagnozdary bar balalardy ońaltýmen aınalysatyn birqatar iri ońaltý ortalyqtary ashyldy. Mysaly, «Asyl Mıras» jańa aýtızm ortalyǵy, bul aýtıstik spektrdiń aýrýlary bar balalardy 50%-ǵa kóbirek qamtýǵa múmkindik berdi. Tuńǵysh Prezıdent Qory men «Samuryq-Qazyna» AQ qoldaýymen №1 qalalyq balalar aýrýhanasy bazasynda ótken jyldyń kúzinde «Qamqorlyq» ońaltý ortalyǵy ashyldy. Ol jyl saıyn sal aýrýyna shaldyqqan 600-ge jýyq balany tegin medısınalyq kómekpen qamtýǵa múmkindik beredi.