Indýstrııa jáne ınfraqurylymdyq damý mınıstrligi Táýelsizdiktiń 30 jylynda avıasııa salasyndaǵy negizgi jetistiktermen bólisti, dep jazady Egemen.kz.
Qazaqstannyń azamattyq avıasııasy memlekettiligimizdiń arqaýy, ol – halqymyzdyń áleýmettik-ekonomıkalyq jaǵdaıy men ál-aýqatyna tikeleı áser etetin ekonomıkanyń kúre tamyry.
«Táýelsizdiktiń 30 jylynda ushý qaýipsizdigi kórsetkishi damyǵan elderdiń deńgeıine kóterildi. IKAO aýdıtorlarynyń IKAO-nyń Úılestirilgen valıdasııalyq mıssııasy (ICVM) sheńberinde salany táýelsiz tekserý qorytyndylary boıynsha Qazaqstan ushý qaýipsizdigin qamtamasyz etý deńgeıin 74-ten 84 paıyzǵa deıin arttyrdy. Bul álemdik ortasha kórsetkishten 15 paıyzǵa joǵary», delingen aqparatta.
Ushý geografııasyn keńeıtý jáne kóliktiń qoljetimdiligin qamtamasyz etý maqsatynda Qazaqstannyń 11 áýejaıynda «ashyq aspan» rejımi engizildi. 68 baǵyt boıynsha 24 elmen jańa halyqaralyq áýe reısteri ashyldy jáne jańartyldy, bul pandemııaǵa deıingi kezeńniń 66% quraıdy.
«Táýelsizdik jyldarynda barlyǵy 18 áýejaıda ushý-qoný jolaqtaryn qaıta qurý/salý jáne 13 áýejaıda termınaldardy qaıta qurý/salý júrgizildi. 2020 jyly Túrkistanda áýejaı salynyp, táýelsiz Qazaqstandaǵy alǵashqy greenfield áýejaıy boldy. Salada sıfrlandyrýdy damytýǵa úlken mán beriledi. «E-Freight» júk áýe tasymaldary salasynda qaǵazsyz qujat aınalymy jobasy iske asyrylýda. Jeke derekterdi rastaýǵa arnalǵan sıfrlyq qujat qyzmeti Egov Mobile engizildi», delingen mınıstrlik málimetinde.