Táýelsizdiktiń 30 jyldyq merekesi aıasynda Arqalyq qalasynda mal bordaqylaý kesheni, elevator jáne jem zaýyty iske qosyldy. Qalanyń ǵana emes, jalpy, Torǵaı óńiriniń áleýmettik-ekonomıkalyq damýyna tyń serpin beretin ınvestısııalyq jobalardyń ashylý rásimine oblys ákimi Arhımed Muhambetov arnaıy kelip qatysty.
Bıyl jyldyń basynda shaǵyn shahardyń mańaıyndaǵy ken qorynyń túgesilýine baılanysty 65 jyl boıy jumys istep kelgen Torǵaı boksıt ken basqarmasy jabylǵanda, Arqalyqtyń keleshegine kúmánmen qaraǵandar da bolǵan. Alaıda óńdeý ónerkásibin damytýǵa myqtap bet burǵan qalada buryn-sońdy bolmaǵan kóptegen tyń joba qolǵa alyndy. Mal sharýashylyǵy ónimderin óńdeıtin óndiris oshaqtary birinen soń biri ashylyp, jańa jumys oryndary paıda boldy. Qala turǵyndarynyń birazy jańa kásip túrlerin ıgerdi. Osylaısha, ónerkásipte qarqyn alǵan qyzý tirshilik kópshilik kóńilindegi kúmándi tez seıiltti.
Endi mine, «Arqalyq Aıdar» JShS mal bordaqylaý alańyn iske qosyp otyr. 40 adamdy jumyspen qamtyp otyrǵan jańa keshen «Torǵaı et» et óńdeý kombınatyn shıkizatpen qamtamasyz etetin bolady. Munda 1 myń iri qara bordaqylanady, al kelesi jyly onyń ústine taǵy 2,5 myń bordaqy mal qosylady dep josparlanǵan. Jobany júzege asyrýǵa 2,7 mlrd teńge jumsalyp otyr.
– Bul endi memlekettiń qoldaýymen iske asyrylyp jatqan úlken joba. Bizde Arqalyqta «Torǵaı et» degen kombınat jumys istep jatyr. Qazir shıkizat tapshylyǵyna baılanysty bul kombınat óziniń óndiristik qýatyn tolyq paıdalana almaı otyr. Bordaqylaý alańy osy olqylyqtyń ornyn toltyrý maqsatynda jasalyp jatqan sharýa. Bıyl 1 myńdaı qoı, 1 myńdaı sıyr ákeldik. Munyń syrtynda, oblys turǵyndarynan jylqy, túıe satyp alyp jatyrmyz, – dedi bordaqylaý alańynyń meńgerýshisi Qarataı Nurmanov.
Meńgerýshiniń aıtýynsha, mal sharýashylyǵy kesheninde tórt jabyq qora bar. Munda turatyn malǵa azyq berý, astyn tazalaý sııaqty jumystardyń bári arnaıy tehnıkanyń kómegimen atqarylady. Máselen, qoradaǵy malyń zári arnaıy káriz qubyrlary arqyly aǵyp baryp, syrttaǵy qudyqqa jınalady. Qudyqtaǵy suıyq keıin jer tyńaıtýǵa paıdalanylady. Bordaqy maldyń tezegi de dál osyndaı jolmen bir shuńqyrǵa kómilip, bir jyldan soń, alqaptarǵa tyńaıtqysh retinde shashylady. Sonymen qatar, munda qolaıly kúnderi mal jaıylatyn jeti jazyq albar, malshylarǵa arnalǵan jeke ǵımarat bar. Onyń ishinde ashana, jýynatyn bólme, dárethana, demalatyn bólme bar, malshynyń jaǵdaıy jan-jaqsy qarastyrylǵan. Bıyl ákimshilik ǵımarattyń qurylysyn aıaqtap úlgermedi. Ol ǵımaratta kelesi jyldan bastap veterınarııalyq zerthana, bordaqylaý alańyna kirip-shyǵatyn malshylar men mamandardy dezınfeksııadan ótkizetin beket jumys istemek.
Oblys ákiminiń qatysýymen ashylǵan taǵy bir kásiporyn – 20 myń tonnaǵa deıin astyq saqtaıtyn elevator. Bul jobanyń quny 1,3 mlrd teńgeniń ústinde. Sondaı-aq Arqalyqta saǵatyna 20 tonna qurama jem daıyndap shyǵaratyn jańa zaýyt jumysyn bastady. Quny 545,6 mln teńge bolatyn qýatty zaýytta jylyna 13 myń tonnadan astam jem óndirilmek.
– Memleketimizdiń qarqyndy damýy turaqty saıasat pen ishki birliktiń negizinde jatyr. Sońǵy 30 jyl ishinde Arqalyqta halyqtyń ál-aýqatyn jaqsartýǵa baǵyttalǵan kóptegen jańa nysandar iske qosyldy. El Táýelsizdiginiń 30 jyldyǵyn merekeleý qarsańynda mundaı nysandardyń ashylýy Arqalyqqa jańa serpin berip, óńirdiń áleýmettik-ekonomıkalyq damýyn jaqsartady, – dedi A.Muhambetov.
Qostanaı oblysy,
Arqalyq qalasy