Táýelsizdiktiń 30 jyldyǵy, Qazaq radıosynyń 100 jyldyǵyna oraı «Qazaq radiosy» – ǵasyr shejiresi: tarıhy, damýy jáne bolashaǵy» sheberlik aptalyǵy Ál-Farabı atyndaǵy Qazaq ulttyq ýnıversıtetiniń jýrnalıstıka fakýlteti Baspasóz jáne elektrondy BAQ kafedrasynyń uıymdastyrýymen ótti. Aptalyq barysynda Qazaq radıosynyń tarıhynan syr shertetin «Qazaqtyń rýhanı tiregi – Qazaq radiosy», «Ulttyń úkili úni» atty kitap kórmesi men foto-kórme tanystyrylymy ótti.
Uly dalanyń únine aınalǵan, ulttyq rýhanııattyń, qazaq óneri men mádenıetiniń qara shańyraǵy «Qazaq radiosy» men «Shalqar» radıosy týraly sheberlik saǵatyn radıoda qyzmet etip, ǵylymı eńbekter jazǵan jýrnalıstıka fakýltetiniń ustazdary júrgizdi.
Aptalyqtyń alǵashqy kúninde bolashaq jýrnalısterge «Tikeleı efırdegi mýzykalyq baǵdarlamanyń mazmuny men kórkemdik sapasy» taqyrybynda sheberlik saǵatyn ótkizgen Mádenıet salasynyń úzdigi, júrgizýshi-redaktor Gúlmıra Nálibaı radıohabarlardyń pármendiligin arttyrýdaǵy mýzykanyń yqpaly, tikeleı efırdiń ózindik erekshelikterine toqtaldy. Al Aqparat salasynyń úzdigi Janar Orazymbet «Radıo efırdegi tulǵalar bolmysy, portrettik habar jasaý tásilderi jáne jańalyqtar daıyndaý» taqyrybynda sheberlik saǵatyn ótkizdi. Janar Orazymbet tulǵalar portretin ashýdyń qyr-syrymen bólise kelip, habar jasaý barysynda keıipkerdiń ómirbaıany men qyzmet jolyn baıandap ótýdiń jetkiliksizdigin ári birsaryndy habarlar tyńdarmanǵa tartymsyz bolatynyn jetkizdi. Al keıipker minezin asha bilýdiń ózi sheberlik bolsa, tulǵanyń beımálim qyrlaryn ashý, ony júrgizýshi daýysymen jetkizý jaqsy habar daıyndaý barysynda qaperge alatyn basty qaǵıdalar.
Aptanyń úshinshi kúni sheberlik saǵatyn ótkizgen «Shalqar radıosynyń» dırektory Bolatbek Tólepbergen táýlik boıy halqymyzdyń salt-dástúri, ádet-ǵurpy, tili, dini, mádenıeti jaıynda habar taratatyn radıonyń tynys-tirshiligine toqtaldy. Radıonyń altyn qorynan Mustafa Shoqaı men Muqaǵalı Maqataevtyń daýysyn tyńdaǵan stýdent-jastar Mustafa Shoqaıdyń: «Túrkistan jastary, birlesińder! Senderdiń birlikteriń, senderdiń bir-birlerińe kúsh qosýlaryń, elimizdiń basyna qyzmet etpek. Muny umytpańdar. Bárimizdiń qubylamyz, ózimizdiń atajurtymyz, ólkemiz – Túrkistan bolmaq. Túrkistan úshin ólý, Túrkistan úshin jan berý – bárimizge bir maqsat. Muny umytpaý kerek. Túrik halqy batyr halyq. Túrik halqy arystan er halyq», – degen jalyndy sózderinen alǵan áserlerimen bólisti.
Radıodaǵy ún tazalyǵy men balalar habaryn daıyndaýdyń ózindik ereksheligi jaıynda jýrnalıst Gúlbaǵysh Bostan aıtyp berdi. Stýdent-jastardyń boıyndaǵy jýrnalıstik qabiletti damytý jóninde tájirıbelik keńestermen bólisken redaktor-júrgizýshi balalar habaryn daıyndaýdyń ádis-tásilderimen bólisse, júrgizýshi-redaktor Ońǵar Quralov efırdegi sóıleý mádenıeti, til tazalyǵy týraly, «Altyn qor» habarlarynyń qundylyǵy jaıynda salmaqty pikirler, tushymdy oılaryn aıtty. Stýdentter til tazalyǵyna baılanysty ǵalym Rabıǵa Syzdyqovanyń, aqyn Orazaqyn Asqardyń jazbalaryn tyńdady.
Bir apta boıy jýrnalıstıka fakýltetiniń stýdentteri «Qazaq radiosy»-nyń arǵy-bergi tarıhynan mol maǵlumat alyp, tájirıbe jınap, sheberlik saǵattaryn ótkizgen professor Klara Qabylǵazınanyń «Dáýir úni», dosent Jıdegúl Ábdijádilqyzynyń «Qazaq radıosyndaǵy táýelsizdik shejiresi», PhD doktor Zarına Qaıratqyzynyń «Podkast bastaýǵa qajetti bazalyq quraldar» jaıyndaǵy dáristerin tyńdady.
Aptalyq barysynda BUU Jahandyq kommýnıkasııalar departamentiniń ókili Vlastımıl Samek, Jýrnalıstıka fakýltetiniń dekany Sansyzbaı Madıev aldaǵy ýaqytta da fakýltet pen Qazaq radıosy arasyndaǵy yntymaqtastyq, ózara tájirıbe almasý jalǵasa beretinin aıtty, sheberlik saǵatyn ótkizgen jýrnalısterge Ál-Farabı atyndaǵy QazUÝ kádesyılaryn tabys etti.
ALMATY