Májilis depýtattary spıker Nurlan Nyǵmatýlınniń tóraǵalyǵymen ótken jalpy otyrysta Áskerı qyzmet jáne arnaýly memlekettik organdar qyzmetkerleri men áskerı qyzmetshilerdiń turǵyn úı qatynastary máseleleri boıynsha keıbir zańnamalyq aktilerge túzetýler engizdi, dep habarlaıdy Egemen.kz.
Qorǵanys mınıstriniń orynbasary Daryn Tuıaqovtyń aıtýynsha, túzetýler úsh zańǵa engiziledi. Olardyń birinde - «Turǵyn úı qatynastary týraly» - qyzmettik turǵyn úılerdi jekeshelendirý quqyǵynyń aýysýy, aqshalaı ótemaqy alý jáne qaıtys bolǵan arnaıy organnyń qyzmetkeri men áskerı qyzmetshiniń otbasy múshelerine almasý quqyǵyn paıdalaný kózdeledi. Budan basqa, qyzmettik turǵyn úılerdi qaldyq quny boıynsha nemese óteýsiz jekeshelendirýge bolady.
Sondaı-aq, qarýly kúshter men basqa da áskerı quralymdar úshin alǵash ret «modýldik turǵyn úı» uǵymy engiziledi. Bul tez salynatyn portatıvti úıler. Olardy satyp alý áskerdi qysqa merzimde turýǵa arnalǵan oryndarmen qamtamasyz etýge, al geosaıası jaǵdaı ózgergen kezde shyǵynsyz kóshirýge múmkindik beredi.
«Áskerı qyzmet jáne áskerı qyzmetshilerdiń mártebesi týraly» zańǵa kelesideı túzetýler engiziledi, olar áskerı qyzmetshilerdiń quqyqtary men mindetterin keńeıtedi.
«Zań jobasynda áskerı qyzmetshige arnaıy memlekettik organdardyń qyzmetkerlerine uqsas quqyqtar men mindetterdi berý usynylady. Eger áskerı qyzmetshi qyzmetten bosatylǵan kúnnen bastap ony qaıtadan qyzmetke qabyldaǵan kúnge deıin úsh aıdan aspasa, al osy ýaqyt ishinde eńbek qatynastary bolmasa, áskerı qyzmettiń úzdiksizdigi de qujat bolyp tanylady», dep túsindirdi Qorǵanys mınıstriniń orynbasary Daryn Tuıaqov.
Budan basqa, kelisimshart boıynsha áskerı qyzmetshilerdiń, áskerı mindettiler abaısyzda zııan keltirgen jaǵdaıda áskerge jáne áskerı jıyndarǵa shaqyrylýy kezinde materıaldyq jaýapkershiligi belgilenetin bolady. Bul rette áskerı qyzmetshilerdiń qasaqana nuqsan keltirilgen jaǵdaıda tolyq materıaldyq jaýaptylyǵy saqtalady.