Qurlyqtyq hokkeı lıgasynda (QHL) óner kórsetip jatqan Nur-Sultannyń «Barysy» 2022 jyldaǵy alǵashqy oıynyn óz muz aıdynynda Rıganyń «Dınamosymen» ótkizdi.
Jerlesterimiz jyldyń birinshi matchynda qarsylas qaqpasyna jeti shaıba soǵyp, «Barys Arenaǵa» jınalǵan jeti myńǵa jýyq jankúıerdi shattyqqa bóledi. Bul – elorda klýbynyń osy maýsymda jeti gol soqqan ekinshi matchy boldy. Buǵan deıin jerlesterimiz Qytaıdyń «Kýnlýn Red Star» ujymyn 7:4 esebimen qapy qaldyrǵan edi.
Goldar shoýyna aınalǵan oıynnyń esebin Roman Starchenko ashty. Birinshi kezeńniń aıaqtalýyna úsh mınýt qalǵanda Starchenko qaqpashymen betpe-bet shyǵyp, mergendik tanytty. Al ekinshi kezeńde Anton Sagadeev dáldik tanytsa, kezeń aıaqtalar tusta Starchenko dýbldiń avtory atandy. Al úshinshi 20 mınýtta «Barys» oıynshylary «Dınamonyń» qaqpasyna jaýapsyz tórt gol soqty. Bul kezeńde Iаkob Berglýnd pen Roman Savchenko bir-bir shaıba salsa, Nıkıta Mıhaılıs dýbl jasady. Al qonaqtardan jubanysh golyn Martınsh Karsýms soqty. Qorytyndy esep – 7:1.
Iýrıı Mıhaılıs shákirtteri kelesi matchyn búgin óz aıdynynda Magnıtogorskiniń «Metallýrgymen» ótkizedi. Qazirgi tańda «Barys» «Shyǵys» konferensııasynyń týrnır kestesinde 44 upaımen 8-orynda keledi.