Mańǵystaýlyqtar Aqtaý qalasyndaǵy «Dostyq» úıinde Almaty qalasyndaǵy búlik kezinde sodyrlar qolynan qapııada qaza tapqan jas batyr Bitim Meıirhandy aqtyq saparǵa shyǵaryp saldy. 2002 jyly 11 maýsymda Aqtaýda ómirge kelgen Meıirhan qaladaǵy №11 mamandandyrylǵan fızıka-matematıka gımnazııasynda bilim aldy. Tártibi men úlgerimi jaǵynan úlgili Meıirhan mektepte dostary kóp, belsendi oqýshylardyń biri boldy.
– Únemi jymıyp júretin jyly júzdi Meıirhannyń tabandy, qaısar minezi áskerı adamǵa tán edi. «Apaı, men mektep bitirgen soń qalaıda áskerı qyzmetker bolýdy qalaımyn» deıtin edi. Tabandy bozbala sózinde turyp attestatyn qolyna alǵan soń oqý grantymen ózi qalaǵan oqý ornyna oqýǵa tústi, –deıdi №11 mamandandyrylǵan fızıka-matematıka gımnazııasynyń dırektory Z.Qorazova.
Meıirhannyń 7-synypta tanysqan dosy Azamat Sultanovtyń aıtýynsha, ekeýi mektep qabyrǵasynda júrgende Almatydaǵy Ulttyq qaýipsizdik komıteti Shekara akademııasynda oqýdy josparlaıdy. Mektepti Azamattan bir jyl buryn bitirgen Meıirhan sózinde turyp, 2020 jyly atalǵan akademııanyń kýrsanty atanady, al Azamat bir jyldan soń baryp kýrsanttar qataryn tolyqtyrady.
Almatyda aıaq astynan dúrbeleń bastalǵan sátte arnaıy buıryqpen qolyna qarýyn alyp Otan qorǵaýǵa umtylǵan jas sarbaz erlikpen qaza tapty. «Táýelsiz elime eńbek etemin!» deıtin elin súıgen patrıot Meıirhan Erjanuly ofıser bolyp eline qyzmet etip shekara shebinde júrýge úlgergen joq, biraq nebári 19 jasynda eldi, jerdi súıýdiń, Otandy qorǵaýdyń qandaı bolatynyn óz erligimen dáleldep ketti. Ol qaza tapqan soń, marqum bolǵan óz qarýlastarymen birge 2022 jyly 9 qańtarda Memleket basshysy Q.Toqaevtyń Jarlyǵymen áskerı jáne qyzmettik boryshyn atqarý ústinde kórsetken batyldyǵy men janqııarlyǵy, sondaı-aq memleket múddesin qorǵaý kezinde jasaǵan erligi úshin III dárejeli «Aıbyn» ordenimen marapattaldy.
Aqtaý qalasyna jetkizilgen Meıirhannyń denesin Mańǵystaý oblysynyń ákimi N.Noǵaev bastaǵan el azamattary, marqumnyń ákesi Erjan, týystary men dostary qarsy aldy. Marqumdy týǵan shańyraǵyna bir túnetip, 10 qańtar kúni janaza namazy oqyldy. «Dostyq» úıiniń aýlasyna Meıirhandy shyǵaryp salýǵa jınalǵan adam óte kóp boldy.
– Meıirhan balamyz naǵyz erlershe kóz jumdy. Azamat úshin eń basty mindet – Otandy qorǵaý! Memleketimizdi qorǵaý jolynda janyn qurban etken Meıirhan Erjanulynyń erligi kópke úlgi, esimi el esinde. Elimiz aman bolsyn, endigi jerde halyqtyń basyna qıyndyq túspesin, jastardyń basyna jamandyq jolyqpasyn. Men Bitim aǵa bastaǵan Kezbaevtar áýletine qaıǵyra kóńil aıta turyp, batyr ul tárbıelegen otbasyǵa alǵys aıtamyn, – dedi aımaq basshysy.
Meıirhan týyp-ósken áýlet Mańǵystaý óńirine belgili, syıly, tekti áýlet. Tek jaǵynan 27 jasynda el-jer qorǵaý úshin qan maıdanda sheıit bolǵan Adaıdaǵy belgili Esenııaz batyrdyń tuqymy bolyp keletin Meıirhannyń atasy Bitim aqsaqal – munaı óndirisi salasynda servıstik qyzmet kórsetip, myńnan astam adamdy jumyspen qamtyp, el ekonomıkasynyń damýyna zor úles qosyp kele jatqan «KezBı» JShS quryltaıshysy. Al Meıirhan – otbasynyń tuńǵyshy, ákesi Erjan – jeke kásipker.
О́zi «altyn balam» dep ataıtyn nemeresiniń janazasynda Bitim aǵaı, týysy Tájmaǵanbet aqsaqal, ustazdary men dostary sóz alyp, keshe ǵana arada júrgen súıkimdi jas jigitke qımastyqpen qınala turyp qoshtasý sóz arnady.
Mańǵystaý oblysy boıynsha Shekara qyzmeti departamentiniń bastyǵy Álibek Koıýpov sóz alyp, «Meıirhan áriptesimiz endi ana álemnen shekara shebin qorǵaýǵa ketti. Erlikpen qaza tapqan marqumnyń topyraǵy torqa bolsyn!» dep kóńil bildirse, jaýyngerler úsh márte oq atty.
Áskerı orkestr Qazaqstan Respýblıkasynyń memlekettik Ánuranyn oryndaǵan sátte kók Týdy jamylyp jatqan jas batyrdyń qulaǵynda qalatyn sońǵy saz, jerdiń ústi – jaryq dúnıeden estıtin sońǵy áni ózi súıgen, ózi janyn qurban etken týǵan eliniń Ánurany boldy.
Qosh bol, eren erliktiń úlgisi – jas batyr!
Mańǵystaý oblysy