Qazaqstan Respýblıkasynyń Premer-Mınıstri Álıhan Smaıylov Reseı Federasııasy Úkimetiniń Tóraǵasy Mıhaıl Mıshýstınmen telefon arqyly sóılesti, dep habarlaıdy Egemen.kz QR Premer-Mınıstriniń baspasóz qyzmetine silteme jasap.
Reseı Federasııasy Úkimetiniń tóraǵasy M.Mıshýstın Á.Smaıylovty Qazaqstan Respýblıkasynyń Premer-Mınıstri laýazymyna taǵaıyndalýymen quttyqtady.
Taraptar strategııalyq áriptestikti ekijaqty jáne kópjaqty formatta odan ári nyǵaıtýǵa ázir ekendikterin bildirdi.
«Qazaqstan Úkimeti Reseı Federasııasymen strategııalyq seriktestikti tereńdetý baǵytyn berik ustanady. Sizben birge ekijaqty kún tártibiniń barlyq salasy boıynsha Qazaqstan-Reseı qarym-qatynasyna tán mazmundy jáne turaqty dıalogty ári qaraı jalǵastyra beremiz dep úmittenemin. Biz buǵan deıin qol jetkizilgen ýaǵdalastyqtardy júzege asyrýǵa barynsha daıynbyz», dedi Á.Smaıylov.
Eýrazııalyq ekonomıkalyq odaq aıasyndaǵy ekijaqty saýda-ekonomıkalyq yntymaqtastyq jáne ózara is-qımyl máseleleri talqylandy.
Reseı – Qazaqstannyń negizgi saýda-ekonomıkalyq seriktesi. О́tken jyldyń 10 aıynyń qorytyndysy boıynsha QR men RF arasyndaǵy taýar aınalymynyń kólemi 30%-ǵa artyp, 19,5 mlrd dollarǵa jetti. Bul rette saýda qurylymyn ártaraptandyrýda ilgerileýshilik baıqalyp otyr. Qazaqstannyń eksport kólemi 39,4%-ǵa, onyń ishinde óńdelgen ónim eksporty 47,7%-ǵa ósti. 2019 jylǵy pandemııaǵa deıingi kezeńmen salystyrǵanda saýda kólemi de 21%-dan astamǵa artty.