Almaty qalasynda oryn alǵan jappaı tártipsizdikke qatysqan qarýy bar qylmystyq top Túrkistan oblysynda quryqtaldy, dep habarlaıdy Egemen.kz.
Almatydaǵy jaǵdaıdy uıaly telefondaryna túsirgen 3 jas jigit Túrkistan oblysyndaǵy blok beketterden ótetin kezde qolǵa tústi. Máseleniń mán-jaıyn Túrkistan oblysy polısııa departamentiniń baspasóz qyzmeti túsindirdi.
Qazyǵurt aýdandyq polısııa bólimi qyzmetkerleri Almaty-Termez-Tashkent tas jolyndaǵy Aqtas blok beketinde «Toıota» markaly avtokólikte bolǵan Saryaǵash jáne Keles aýdandarynyń 3 turǵynyn ustaǵan. Tekserý kezinde jedel ýákilder kólikten tapansha tapqan.
Atalǵan fakti qylmystyq kodekstiń 287-baby «Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý» boıynsha tirkelgen. Kúdiktilerdiń barlyǵy qamalǵan. Búginde sotqa deıingi tergeý amaldary júrgizilýde.