Túrkistandaǵy «Áziret Sultan» memlekettik tarıhı-mádenı qoryq-mýzeıi sońǵy jyldary «Iаsaýı izimen» atty ǵylymı-tanymdyq ekspedısııa uıymdastyryp, haziret muralaryna qatysty derekter jınaqtaýda. Jýyqta osy maqsatpen Kókshetaý qalasyna at basyn burǵan top oblystyq Ádebıet jáne óner mýzeıi qorynda saqtaýly turǵan «Dıýanı hıkmet» kitabynyń qoljazba kóshirmesimen tanysty.
Osyǵan deıin atalǵan «Hıkmetter» jınaǵynyń ózbek, túrik tilderindegi kóne nusqasy anyqtalǵany belgili. Al bul retki Kókshetaý qalasynda ornalasqan Ádebıet jáne óner mýzeıi qoryndaǵy qoljazba kóshirmesin jiti qarap, ózge nusqalarmen salystyra zerttegen fılologııa ǵylymdarynyń kandıdaty Imanǵazy Nurahmetuly bul jádigerdegi jyr joldary eski shaǵataı tilinde jazylǵan hám qoljazba óte kóne nusqa degen paıym aıtypty.
Bul kitap shamamen XVI-XVII ǵasyrlar aralyǵynda Buhar qaǵazyna túsirilgen. Kitap orta ǵasyrlyq jazba-ádebı tildiń shaǵataı nusqasy – qypshaq dıalektisinde jazylǵan. Mura tili qazirgi qazaqtyń ádebı-jazba tiline óte jaqyn. Buǵan deıin belgili bolǵan nusqalar ejelgi oǵyz dıalektisi, ıaǵnı qazirgi ózbek tiline jaqyn jazylǵan.
Mýzeıdegi qoljazba nusqa sırek kezdesetin úlgi. 90 betten turatyn qoljazbany tolyq aýdarǵan jaǵdaıda burynǵy málim bolǵan 3 nusqamen salystyrýlardyń nátıjesinde transkrıpsııalyq, mátindik, kórkem poetıkalyq úlken aıyrmashylyqtyń, ózgesheliktiń betin ashýǵa bolady jáne bul qoljazba qazaq ádebıeti úshin de, til tarıhy úshin de, ejelgi dinı-fılosofııa úshin de teńdessiz qundy, mańyzdy rýhanı mura.
«Qoljazbany murajaıǵa jergilikti turǵyndardyń biri tapsyrsa kerek. Kóshirmeniń qashan, qaı jerde, kimniń qolymen jazylǵany týraly naqty derek joq, bas-aıaǵy jyrtylǵan, saqtalýy asa jaqsy emes, tym eski qoljazba ekeni belgili. Syrtqy betinde «Bekmuhammet Ahmetuly» (Bekmaǵambet bolýy da múmkin) degen adamnyń aty jazylǵan. Sonyń aıaq jaǵynda «ıesi Molla Bekmuhamet» degen sóz bar. Bul adam hıkmetterdi kóshirip jazýshy ma? Qoljazbany saqtaýshy ma? Ol jaǵy anyq emes. Murajaı dırektory Nurbek Nuralın: «Bul qoljazbany Kókshetaýǵa Ońtústik jaqtan Sarǵaldaq qoja degen kisi ákelip, Sarǵaldaq qojanyń qyzy Aıǵanymnyń qolynda saqtalǵan bolýy múmkin» degen boljam aıtady. Ondaı boljam jasaýǵa qoljazbanyń Ǵ.Músirepov (Rýzaevka) aýdanynan tabylǵany sebep bolǵan sııaqty. Músirepov aýylynda Abylaı zamanynan beri qojalar mekendegen eken. Buhardan oqyǵan ǵulama Sarǵaldaq qojanyń urpaqtary keıinge deıin sonda bolypty. Sarǵaldaq qojanyń ózi Qoja Ahmet Iаsaýıdiń týǵan inisi Sadyr shaıhtyń urpaǵy deıdi. Shoqannyń ájesi Aıǵanym osy Sarǵaldaq qojanyń qyzy eken», deıdi zertteýshi Imanǵazy Nurahmetuly.