Tennısten Qazaqstannyń birinshi, álemniń 13-shi raketkasy Elena Rybakına Sıdneıde (Aýstralııa) ótip jatqan WTA 500 týrnırin sátti bastady.
Atalǵan dodada toǵyzynshy nómirmen óner kórsetip jatqan Elena alǵashqy aınalymda byltyrǵy US Open týrnıriniń jeńimpazy brıtanııalyq Emma Radýkanýmen kezdesip, aıqyn basymdyqpen jeńiske jetti. Dúnıejúzilik reıtıngte 18-orynǵa jaıǵasqan Radýkaný jerlesimizge tek bir geım ǵana qarsylyq kórsete aldy. 56 mınýtqa ǵana sozylǵan oıynda E.Rybakına qarsylasyn eki sette – 6:0, 6:1 esebimen utty. Bul sportshylar arasyndaǵy alǵashqy kezdesý boldy. Otandasymyz match barysynda tórt eıs jasap, dopty oıynǵa qosý sátinde bir márte qatelesti. Endi qazaqstandyq tennısshi kelesi kezeńde fransııalyq Karolına Garsııamen sheberlik baıqasady.
Osy týrnırdiń juptyq básekesinde óner kórsetip jatqan Aleksandr Nedovesov pákistandyq Aısam Kýreshımen birge jup qurap, birinshi aınalymda Harrı Helıovaara (Fınlıandııa) jáne Lloıd Glasspýl (Ulybrıtanııa) jubymen kezdesip, úsh sette jeńiske jetti – 6:7, 6:3, 10:7. Ekinshi raýndta Nedovesov pen Kýreshı Marselo Arevalo (Salvador)/Jan-Jıýlen Roıer (Nıderland) jubymen kezdesedi. Sondaı-aq horvatııalyq Franko Skýgormen birge oınap jatqan taǵy bir qazaqstandyq Andreı Golýbev te ekinshi aınalymǵa joldama aldy.