Qyzylorda oblysynyń mektepterinde túrli syltaýmen ata-analardan jylý jınaý búginde qaterli isikteı qatty tamyrlap ketken. Jaǵdaıdyń osylaısha óziniń sharyqtaý shegine jetkenin oblys ákimi Qyrymbek Kósherbaev ta jaqsy biledi. Ol sondyqtan da jemqorlyqqa qarsy kúres komıssııasynyń sońǵy otyrysynda jemqorlyqqa qarsy kúresti mektepterden bastaý kerek ekenin ashyp ta, ashynyp ta aıtty.
Aımaq basshysy májiliste mektepterdegi keń etek jaıǵan oqýshylardan retsiz aqsha jınaý úrdisiniń tamyryna balta shabýǵa shaqyrdy. Jıynda ústimizdegi jyly bilim salasyna bólinip otyrǵan qarjynyń úsh esege jýyq artyp otyrǵany tilge tıek etilip, oqý oryndarynyń aqshadan muqtajdyq kóretin retteri joq ekenderi alǵa tartyldy. Bilim júıesinde baldyrǵandardy balalar baqshasy men mektepterge ornalastyrýdan bastap, pedagogtardy osy mekemelerge jumysqa alý, attestasııadan ótkizý, olardy oqytý sekildi úderisterdiń árbir kezeńi eshbir búkpesiz ashyq júrgizilýleri kerek. Sonda para alýǵa da jol berilmeıdi. Osyǵan oraı, bilim beretin mekemelerge ata-analardyń aryzdary men shaǵymdaryn qabyldaıtyn jáshikter ornatyp, mektepter men balalar baqshalarynda demeýshilik kómek degen jeleýmen ata-analardan aqsha jınaýdy úzildi-kesildi toqtatý tapsyryldy.
«Mektep basshylyǵy osylaısha turmystary tómen otbasylaryn tyǵyryqqa tirep, olardyń balalaryn ózderin kem sezinýge alyp baratyn jaǵdaılarǵa jetkizedi. Osyndaı bolmaýy úshin biróńkeı mektep kıiminiń úlgisi de jasaldy. Al otbasylary ál-aýqatyndaǵy aıyrmashylyqtardy bildirmeý úshin engizilgen mundaı sharalar, ásirese, bastaýysh synyptardaǵy oqýshylar arasynda qatty qolǵa alyndy. Muǵalimder demeýshilik kómek retinde aqsha jınaý arqyly ata-analardyń ártúrli jaǵdaıda ekenderin anyq baıqatatyn qadamdardy jasaıdy. Osyǵan kóngen áke-sheshe balalaryn tómendetpeý úshin kórshilerinen qaryzǵa aqsha alýǵa deıin baryp jatady. Biz buǵan jol bere almaımyz», – dedi aımaq basshysy.
Mektep muǵalimderiniń moraldyq bet-beıneleri – bólek áńgimeniń taqyryby. Olar barlyq jaǵynan ózderi sabaq beretin oqýshylarǵa úlgi-ónege bolýǵa tıis. Alaıda, mektepterde keı jaǵdaıda qolaısyz psıhologııalyq ahýal qalyptasyp, dırektordyń tóńireginde ártúrli qıturqy oıyndar oınalyp jatady.
«Qyzyljarma kentindegi №144 orta mektepte oryn alǵan dırektordyń oqýshylarmen jáne turǵyndarmen «tutas soǵys» ashqan oqıǵasy bizge belgili. Endi taıaýda densaýlyq saqtaý salasynda qordalanyp qalǵan ózekti máselelerdi sheshýge kóńil bólgenimizdeı, bilim berý júıesin de sozylmaly syrqatynan «emdeýimiz» kerek. Alaıda, bul emdeý ótken jyly 27 mektep dırektoryn oryndarynan alǵanymyz sııaqty dámi ashylaý dárilerdi taǵaıyndaýymyzdy kerek etedi», – dedi Q.Kósherbaev.
Oblys ákimi osyǵan baılanysty qala jáne aýdandar ákimderine mańyzdy máselelerdi shesherde «taıpaaralyq shaıqastardyń» týyp ketý múmkindigin joqqa shyǵaratyn jarııalylyq pen ashyqtyqty qamtamasyz ete otyryp, baqylaýshy organdarǵa «qolaısyz» adamdardy belgileýdi, sóıtip, bul baǵyttaǵy jumystardy jandandyra túsýdi tapsyrdy.
Qurysh NURYMBET.