Qyzylorda oblysy Jańaqorǵan aýdandyq prokýratýrasy «Jańaqorǵan agrarly-tehnıkalyq kolledji» memlekettik mekemesi oqýdan shyǵarǵan Gaýhar Dúısenbaevanyń shaǵymyn qaraý barysynda oqý orny basshylyǵynyń kámeletke tolmaǵan qyzdyń Konstıtýsııalyq quqyqtaryna eleýli nuqsan keltirgenin anyqtady.
Qazaqstan Respýblıkasynyń «Bilim týraly» Zańy 1-babynyń 49-tarmaǵy azamattardyń orta bilimdi Konstıtýsııa kepildigine saı alatyny anyq kórsetilgen. Sol sııaqty Qazaqstan Respýblıkasynyń «Qazaqstan Respýblıkasyndaǵy balanyń quqyqtary týraly» Zańy 15-babynyń 1-tarmaǵynda árbir balanyń bilim alýǵa quqyǵy bar ekeni aıtyla kelip, oǵan tegin bastaýysh, negizgi orta, jalpy orta bilim jáne konkýrstyq negizde tegin tehnıkalyq, kásiptik jáne orta bilimnen keıingi joǵary bilim alýǵa kepildik beriledi delingen.
Mine, osyndaı zańdylyqqa súıengen kolledj dırektory M.Ahmetov 2013 jylǵy 29 tamyzda bergen buıryǵyna sáıkes, 1997 jyly týǵan Gaýhar Dúısenbaevany «Tiginshi» mamandyǵy boıynsha kúndizgi oqý bóliminiń №56 oqý tobyna qabyldaǵan. Alaıda, ol oqý jyly tolyq bastalyp úlgermeı jatyp, 2-6 qyrkúıek kúnderi sabaqqa sebepsiz qatyspady degen jeleýmen 7 qyrkúıek kúni shyǵarylyp jiberilgen. Adam taǵdyryn oıynshyq kórgen basshy mundaı tujyrymmen oqýdan shyǵarýǵa bolmaıtynyn eskermegen. Ol tipti bul kelmeýdiń astarynda ne jatqanyn tekserip, oǵan tereń boılaýdy jón kórmegen. Dırektordyń mundaı óreskel qadamǵa barýyna №56 oqý tobynyń sheberi A.Álıevanyń bergen kórsetýi negiz bolǵan. Al oqý sheberi G.Dúısenbaevanyń sabaqqa kelmeýine baılanysty 2 qyrkúıek kúni onyń úıine baryp, anasymen sóıleskenin, áıeldiń qyzy aýyryp qalǵandyqtan, oqýǵa bara almaǵanyn aıtqanyn jazyp bergen. Áńgime barysynda oqýshynyń anasy qyzyn dárigerge kórsetetinin jetkizipti. Osy mezgilde dırektordyń tárbıe isi jónindegi orynbasary K.Dándibaev óz kórsetýinde top sheberi A.Álıevanyń oqýshy otbasy jaǵdaıyna baılanysty kolledjde oqı almaıtynyn jazyp bergenin, biraq onyń G.Dúısenbaevanyń sabaqqa kelmeı júrgen kúnderine qatysty zertteý júrgizbegenin keltirgen. Osynyń bárin kórip-bile otyryp, kolledj dırektory kámeletke tolmaǵan oqýshy qyzdy bir-aq kúnniń ishinde oqýdan shyǵaryp jibergen.
Al joǵarydaǵy Zańnyń 15-baby 2-tarmaǵynda tegin jalpy orta bilim nemese tehnıkalyq jáne kásiptik bilim alǵanǵa deıin balany memlekettik bilim berý mekemesinen shyǵarý, shyǵarýdyń jalpy tártibin saqtaýmen qatar tek qorǵanshy jáne qamqorshy organdardy habardar ete otyryp qana júrgizilýi múmkin ekeni kórsetilgen. Osylaısha, kolledj basshylyǵy kámeletke tolmaǵan qyzdyń Konstıtýsııamen kepil berilgen mindetti orta bilim alýynyń qasaqana jolyn kesken. Sondyqtan iske aýdandyq prokýratýra aralasyp, oblystyq bilim basqarmasyna zań buzýshylyqtardy joıý jóninde usynys keltirdi. Onyń qaralý nátıjesinde G.Dúısenbaeva ózi túsken oqý ornynyń 1-kýrsyna qaıta qabyldandy. Munyń qorytyndysynda zań buzýshylyqtarǵa jol bergen kolledj dırektory M.Ahmetov, onyń tárbıe isi jónindegi orynbasary K.Dándibaev – sógis, óndiristik oqý sheberi A.Álıeva men kadr bólimniń qyzmetkeri D.Rústemova eskertý túrindegi tártiptik jazalar aldy.
Rýslan PIRNAZAR,
Jańaqorǵan aýdany prokýrorynyń kómekshisi.
Qyzylorda oblysy.