Táýbeshil halqymyz ádilet, abyroı jáne memleket úshin táýekelshil de bola alatynyn kórsetti. Syn saǵatta jaýapkershilik alǵan Memleket basshysyna senip, ult bolyp uıysqan halyq óziniń adal nıetin lańkester, sodyrlar, olardy jumsaǵan aramza da ashqaraq ishki jáne syrtqy jaýlar paıdalanǵanyna ózegi órtengenimen, táýelsiz Qazaqstandy, el múddesin bárinen joǵary qasterleıtinin dáleldedi.
Talaı bozdaqtyń ómiri qurban bolǵan qantógis kezinde de, Prezıdent basshylyǵymen tártip ornatyla bastaǵanda da mıllıondaǵan azamattyń bıik jaýapkershiligin, yntymaǵyn jáne otansúıgishtigin kórdik. Halyqtyń birligi men senimi Prezıdent Qasym-Jomart Toqaevqa batyl sheshimderdi ýaqtyly qabyldap, olardy oryndatýǵa jaǵdaı týǵyzdy.
Prezıdenttiń keshegi baıandamasy eń joǵary minberden aıtylǵan eń ótkir baǵasymen, el men jer baılyǵyn halyq ıgiligine paıdalanýǵa, táýelsizdikti qorǵaýǵa baǵyttalǵan ózekti sheshimderimen kóńilge senim uıalatty.
Ol sheshimderdi júzege asyrý jańadan jasaqtalǵan Úkimetke syn. Az kúnde tez eseıip, óziniń qýatymen qatar jaýapkershiligin sezgen qoǵam da, táýelsizdigimiz ben memleketimizdi qorǵaýda bar jaýapkershilikti alyp, kósh bastaǵan Prezıdent te Úkimet pen ákimder jumysyn jiti baqylap, qajet kezde túıin túıeri sózsiz.
Qazirgi qysyltaıań kezde shuǵyl sharalardy qajet etetin yrǵaqty jumysty tez bastaý úshin qolda bar adamdardy paıdalanǵany da túsinikti. Olardyń árqaısysy da bolǵan oqıǵalardan sabaq alyp, qoǵammen birge ózgerdi dep úmittenemin. Syn sátterdegi ustanymdary da taǵaıyndaý týraly sheshim qabyldarda eskerilgen bolar.
Úkimettiń alǵashqy otyrysyn kórdik. Bilýimshe, basynan aıaǵyna deıin memlekettik tilde ótken alǵash úkimet otyrysy. Endi ekonomıkany kóterip, halyqtyń turmysyn jaqsartýda eńbekteri jemisti bolýyna tilektespin.
Qolymyzdan kelgen kómegimizdi kórsetip, jaǵdaıdy qalpyna keltirip, Qazaqstanymyzdy turaqty damytýǵa atsalysýdy azamattyq paryzymyz dep sanaımyn.
Qordalanǵan máselelerdi sheshýge septesetin naqty usynystarymyz bolsa, Prezıdent pen Úkimetke joldaıyq.
Halyq áleýetin el ıgiligine paıdalanýǵa jaǵdaı týǵyzatyn saıası reformalar da daıyndalyp jatqanyn, olardyń qoǵammen, sarapshylarmen talqylanǵan soń jarııalanatynyn Prezıdent habarlady. Olar bılik tarmaqtary tepe-teńdigi, sot táýelsizdigi men ádildigi, Parlament pen máslıhattaǵylardyń halyq ókilderi bolýyn qamtamasyz etý, sóz ben jınalys bostandyǵy sekildi baǵyttardy qamtıdy dep senemin.
Sonymen qatar Prezıdent Qasym-Jomart Toqaevtyń «Halyq únine qulaq asatyn memleket» tujyrymdamasy júzege asýy úshin de saıası reformalar qajet. Sebebi halyqty estý qabileti memlekettik apparat pen bıliktiń kásibıligine baılanysty bolsa, halyqty estip, túsinýge degen ynta men qulyq laýazym ıeleriniń taǵdyryn halyq pikirimen baılanystyratyn saıası júıege táýeldi. Osy reformalar týraly usynystardy engizip, olardy talqylaýda azamattar men qoǵamdyq uıymdardyń saıası pikirtalasty jasampazdyq saıysyna aınaldyryp, oń ózgeristerge muryndyq bolýlaryna tilektespin.
Bul – bizdiń keshegi qantógiste sheıit bolǵan bozdaqtar men táýelsizdikti ańsaǵan ata-baba arýaǵy jáne bolashaq urpaq aldyndaǵy paryzymyz.
Álıhan BAIMENOV