Almaty qalasynda muqtaj jandarǵa kómek kórsetý maqsatynda eriktiler shtaby jumys isteı bastady. Shtab kómekke muqtaj barlyq qala turǵyndaryna qoldaý kórsetýdi maqsat etedi. Volonterler shtabynda konsýltasııalyq, psıhologııalyq, zańdyq, aqparattyq-túsindirý jumystary jáne shuǵyl jeli telefonyna kelip túsken ótinishter boıynsha volonterlik kómek kórsetiledi.
Shtab jumysyna Jastar resýrstyq ortalyǵy, «Qazaqstan volonterler lıgasy» QQ, «Jas Otan» JQ, Almaty meıirimdilik klýby, Lider.kz jáne taǵy basqa tájirıbeli volonterler men qalanyń iri volonterlik uıymdary jumyldyrylǵan. Abylaı han kóshesi, 79 jáne Baıtursynov kóshesi, 22/1 meken-jaıynda ornalasqan qalalyq eriktiler shtaby +7 (727) 279 13 29, +7 (727) 225 49 01, +7 (705) 213 00 77 telefondary boıynsha ótinishter qabyldap, kún saıyn saǵat 9.00-den 17.00-ge deıin jumys isteıdi.
Búginde eriktiler búlikshiler búliginen búlingen qala ishin qoqystardan tazartyp, qaıta qalpyna kelýine bar kúsh-jigerin aıamaýda. Eriktiler eń aldymen eldegi tótenshe jaǵdaıda qoǵam qaýipsizdigi, turǵyndardyń amandyǵy úshin kúresip jatqan aýrýhana qyzmetkerleri men áskerılerge, sondaı-aq naýqastarǵa, zeınetkerlerge azyq-túlik pen tamaq úlestirýde. Osy bir aptanyń ishinde eriktiler mindetine kiriskenderdiń sany 300-den asady. Qala turǵyndary, túrli qaýymdastyqtar, qoǵamdyq qorlar men kásipkerler, taǵy da basqa qala ómirine beıjaı qaramaıtyn eriktiler búginde muqtaj jandarǵa 21 tonna azyq-túlik taratqan.
«Jastarǵa jol» qoǵamdyq qorynyń derekterine súıensek, qaladaǵy alasapyran kezinde biri tamaq istese, biri nan pisirip, jan-jaqty qoldan kelgen kómekti kórsetýge tyrysqan eriktiler kóp bolǵan. Túrli kómek túrin usynǵan almatylyqtardyń kópshiligi qan tapsyrýǵa da barǵan. Azyq-túlikpen ǵana emes, qalany qaıta qalpyna keltirýge de birikken jastardyń qarasy qalyń. Eriktiler azyq-túlik sebetteri men basqa da kómek túrlerine óz qarajatyn jumsaǵan. Qaıyrymdy jandardan 35 mln teńge qarjy jınalypty. Qıyn-qystaý kezeńde jaqsylyq jasaýǵa umtylǵan almatylyqtardyń áreketi kópke úlgi.
ALMATY