Chempıondy kútip aldy

Jýyrda Polsha astanasy Varshavada shahmattan álem chempıonaty aıaqtalǵany belgili. Álem­dik jarystarda shashasyna shań juqtyrmaýǵa tyrysatyn biz­diń Bıbisara bul joly da júri­sinen jańylǵan joq. Ol blıs básekesinde qarsylastaryn qapyda qaldyryp, álemdik shahmat tarıhynda áıelder arasynda chempıon atanǵan eń jas shahmatshy dep tanyldy.

Atap óterligi, jerlesimiz bul básekede eshkimge des bermeı, jarystyń aıaqtalýyna bir týr qalǵanda chempıon atandy. Bul otandyq sport tarıhyndaǵy erek­she oqıǵa. Blıs jarysynda ekin­shi oryn reseılik Aleksandra Kostenıýkke buıyrdy. Ol bu­ǵan deıin rapıd básekesinde top jar­ǵan bolatyn. Taǵy bir reseılik sportshy Valentına Gýnına úshin­shi oryndy qanaǵat tutty.

Jalpy, Bıbisara buǵan deıin 8, 10, 12 jáne 14 jasqa deıingi qyzdar arasynda klassıkalyq shah­mattan álem chempıony atan­ǵan bolatyn. Sondaı-aq onyń 7 jáne 9 jasqa deıingi oqýshylar ara­syn­daǵy álem chempıony degen ataq­tary bar.

Varshavadaǵy básekede Bıbi­sara altynmen ǵana shektelmeı, rapıd básekesinde kúmis júldeni qanaǵat tutty. 17 jasar sportshy she­shýshi synda grýzııalyq grossmeıster Nana Dzagnıdzeni qapy­da qaldyrdy. Sondaı-aq jerlesi­miz Ásel Serikbaıdy utty. Dál osy synda top jarǵan reseılik Alek­sandra Kostenıýkpen teń oınady.

2021 jyl Bıbisara úshin jemisti boldy. Ol álem chempıonatyndaǵy jetistikterinen bólek, onlaın formatta uıymdastyrylǵan Azııa birinshiliginde jeńiske jetti. Otandasymyz ulttyq quramamen birge álemdegi úzdik 8 komandanyń qataryna qosyldy.

– Chempıonat óte tartysty órildi. Eresekter arasyndaǵy álem chempıonatynda altyn jáne kúmis júldege qol jetkizgenim úshin qýanyshtymyn. Oınalǵan par­tııanyń bári ońaıǵa tústi dep aıta almaımyn. Onyń ústine eresekter arasyndaǵy jarys bolǵandyq­tan qarsylastardyń deńgeıi óte joǵa­ry. Osy oraıda jattyqtyrýshym Sergeı Dolmatovqa alǵysymdy bildi­remin. Onyń jetekshiligimen do­daǵa tynǵylyqty daıyndaldyq. Eresekter arasynda álem chempıo­ny bolý armanym edi. Sol armanym oryndaldy, – deıdi Bıbisara Asaýbaeva.

Eske sala keteıik, shahmattyń rapıd jáne blıs túrlerinen óte­tin álem chempıonaty jankúıer qaýymnyń erekshe taǵatsyzdana kútetin dodalarynyń biri. Bıyl bul jarysqa 50 memleketten 200-den astam sportshy qatysty. Chempıonattyń jalpy júlde qory 1 mln AQSh dollaryn qurady.

Jas kúninen jurtshylyq nazarynda júrgen Bıbisara Asaýbaeva áıelder arasyndaǵy grossmeıs­ter (2019) ekenin atap ótken jón. Sonymen qatar ol erler ara­syndaǵy halyqaralyq sport she­beri atanǵan (2020). Ol 2004 jy­ly 26 aqpanda Taraz qalasynda dú­nıe­ge kelgen.