Shaıbaly hokkeıden elordanyń «Barysy» óner kórsetetin Qurlyqtyq hokkeı lıgasynyń (QHL) oıyndary merziminen buryn toqtatyldy. 23 qańtarda Olımpııa oıyndaryna baılanysty úziliske shyǵýy kerek bolǵan QHL komandalary 14 qańtardan bastap bir aılyq demalys aldy. Oıyndardyń toqtaýyna klýbtarda koronavırýsqa shaldyqqan hokkeıshilerdiń tym kóptigi sebep boldy.
Bastapqyda Qurlyqtyq hokkeı lıgasynyń prezıdenti Alekseı Morozov turaqty birinshilikte baq synaıtyn komandalardyń basshylarymen beınebaılanysqa shyǵyp, kópshiliktiń qalaýymen jarysty jalǵastyra beretin bolyp sheshken edi. Alaıda koronavırýsqa shaldyqqan oıynshylar men komandalardyń kóptigine baılanysty lıgany ýaqytsha toqtatýǵa májbúr boldy.
«Biz ótken aptada birqatar klýb jetekshilerimen onlaın kezdesý ótkizip, QHL-dyń qazirgi jaǵdaıyn talqylaǵan edik. Qazir lıgada jaǵdaı tym qıyn bolyp tur. COVID-19 pandemııasyna baılanysty 14 matchty toqtatyp, bireýin basqa kúnge aýystyrdyq. Sońǵy aptada aýrýǵa shaldyqqandardyń sany 127 adamǵa jetti. Pandemııa bastalǵaly beri QHL-da mundaı kórsetkish tirkelmegen edi. Eger kestege qaraıtyn bolsańyz, 2020/21 jylǵy maýsymda bizde aptasyna eń kóp degenniń ózinde 30 adam ǵana indetke shaldyqty», dedi A.Morozov.
Turaqty birinshiliktiń matchtary resmı toqtatylǵanǵa deıin «Barystyń» syrt aıdyndaǵy eki oıyny qarsylas komanda oıynshylarynan koronavırýs anyqtalýyna baılanysty keıinge shegerildi. Máselen, alǵash elordalyq klýbtyń «Torpedomen» (Nıjnıı Novgorod) matchy keıinge shegerilse, keıinnen Podolskiniń «Vıtıaz» komandasynyń oıynshylary muzaıdynǵa tolyq quramda shyǵa almaıtyny belgili bolǵan soń, lıga basshylyǵy bul kezdesýdi de toqtatýǵa májbúr boldy.
QHL-dyń merziminen buryn toqtatylýyna jáne komandalardyń bir aıǵa jýyq úziliske shyǵýy oıynshylarǵa qalaı áser etetinine qatysty «Barystyń» bas bapkeri Iýrıı Mıhaılıs pikir bildirdi.
– Úziliske deıingi birneshe kún biz úshin óte qıyn ótti. Eldegi jaǵdaıǵa baılanysty syrt aıdyndaǵy oıynǵa ushýymyz biraz tejelip, onyń ústine Magnıtogorskidegi borandy aýa raıyna baılanysty ushaǵymyz basqa qalaǵa qonýǵa májbúr boldy. Ol az bolǵandaı, «Metallýrgpen» bolatyn oıynǵa match bastalýyna eki saǵat qalǵanda áreń jettik. Osyndaı qıyn kezeńdi bastan ótkerip jatqanda qarsylastarymyzdyń oıynshylarynan koronavırýs anyqtalyp, mańyzdy matchtarymyz keıinge qaldyryldy. Degenmen bul jaǵdaılarǵa qaramastan oıynshylardyń bári qazir jaqsy fızıkalyq kúıde ekenin aıtqym keledi. Árıne, qalyptasqan jaǵdaıda, eń bastysy, hokkeıshilerdiń, jattyqtyrýshylardyń, qyzmetkerlerdiń, matchtardy ótkizýge qatysatyn barlyq adamnyń densaýlyǵy mańyzdy ekenin túsinemiz. Sondyqtan bári májbúrli úzilis týraly jańalyqtarǵa túsinistikpen qarady. Qazir jigitterge demalýǵa ýaqyt berdik. Ári qaraı mindetti túrde PTR-test tapsyryp, elordada jattyǵýymyzdy qaıta bastaımyz. Endi lıganyń jańarǵan kestesin kútemiz. QHL usynǵan kúntizbege súıene otyryp, oıynymyzdy jalǵastyratyn bolamyz», deıdi Iý.Mıhaılıs.
Turaqty birinshilik oıyndary ýaqytsha toqtaǵanǵa deıin elordanyń «Barysy» chempıonattyń «Shyǵys» konferensııasyndaǵy týrnır kestesinde 8-orynǵa turaqtady. Jerlesterimizdiń enshisinde 47 matchtan keıin 48 upaı bar. Eger alda-jalda QHL oıyndary dál osy jerden toqtaıtyn bolsa, «Barys» pleı-off kezeńine tikeleı joldama alady.
Ázirge «Barysty» týrnır kestesinde eki komanda ókshelep keledi. Olar – «Amýr» men «Avtomobılıst». Alǵashqysy «Barystan» úsh oıyn kóp ótkizse de, eki upaı kem jınaǵan. Al «Avtomobılıst» koronavırýsqa shaldyqqan oıynshylary kóp bolǵandyqtan, eki match az ótkizgen ári 6 upaı qalyp keledi.
Qazirgi tańda turaqty birinshiliktiń basshylyǵy úzilis ýaqytyn tıimdi paıdalanyp, lıga oıyndarynyń kúntizbesin qaıta qarap, túrli nusqany talqylap jatyr. Jyldaǵy dástúr boıynsha aqpan aıynyń sońynda QHL oıyndary aıaqtalyp, naýryzda Gagarın kýbogy jolyndaǵy pleı-off matchtary bastalatyn edi. Alaıda bıylǵy jaǵdaı sál ózgeshe bolyp tur. Olımpıadalyq úzilisten keıingi oıyndar 22 aqpanda qaıta jalǵasady. Al keıbir komandalardyń áli oınalmaǵan 15 matchy bar. Iаǵnı klýbtar 15 kezdesýdi ár eki kún saıyn ótkizgenniń ózinde bir aı ýaqyt kerek bolady. Demek QHL matchtary aqpanda emes, naýryzdyń sońynda aıaqtalatyn túri bar. Al sáýirdiń sońyna deıin Gagarın kýbogynyń jeńimpazy anyqtalyp úlgerýi kerek. Sebebi birqatar hokkeıshiniń komandamen kelisimsharty 30 sáýirde aıaqtalady.
– Qazir biz múmkin bolatyn barlyq jaǵdaıdy qarastyryp jatyrmyz. Áýeli biz turaqty birinshilikti meılinshe tez aıaqtaýdy kózdep otyrmyz. Al Gagarın kýbogy jolyndaǵy pleı-off oıyndary boıynsha bizde túrli nusqa bar. Ssenarıı boıynsha jumys istegen kezde biz mamyrda pleı-offtyń bir bóligin oınaýdy maqsat etken edik. Alaıda mamyr aıyna ótip ketsek, birqatar zańdyq turǵydaǵy máselege tap keleıin dep turmyz. Atap aıtqanda, QHL erejelerin ózgertýge, oıynshylardyń kelisimsharttaryn qaıta jazýǵa, sanaýly oıynǵa baılanysty jalaqy taǵaıyndaýǵa jáne taǵy basqa usaq máselelerdi sheshýge týra keledi. Sonymen qatar 13 mamyrda Fınlıandııada kezekti álem chempıonaty bastalady. IIHF erejeleri boıynsha biz oıynshylardy birinshilikke bir apta qalǵanda ulttyq quramalaryna jiberýimiz kerek, – deıdi A.Morozov.
Reseılik BAQ ókilderiniń jazýynsha, QHL komandalary turaqty birinshilik basshylyǵynan oıyndardy jalǵastyrýǵa arnalǵan birneshe nusqa usynylǵan resmı habarlama alǵan. Komandalar ózderine yńǵaıly bir nusqany tańdap, basshylyqqa jiberýi kerek.
Komandalardyń basym bóligi QHL-dyń bıylǵy maýsymyn ádettegideı 60 emes, 52 matchpen aıaqtaýǵa nıet tanytyp otyrǵan kórinedi. Al lıga oıyndary qalaı jalǵasatyny týraly resmı aqparat jýyq arada habarlanady.