Qyzylordada jappaı tártipsizdikke qatysqan eki kóp balaly ana ustaldy, dep habarlaıdy Egemen.kz.
Qyzylorda polısııa departamentiniń baspasóz qyzmetiniń málimetinshe, ustalǵandar qańtar oqıǵasynyń basqa qatysýshylarymen birge Qyzylorda oblysy ákimdiginiń ǵımaratyna basyp kirgen.
«Qyzylordada 2022 jyl 5 qańtarda bolǵan jappaı tártipsizdik kezinde eki azamatsha mıtıngke qatysýshylarmen birge oblys ákimdiginiń ǵımaratyna zańsyz basyp kirip, jappaı tártipsizdik jasaǵan. Vıdeodan kórinip turǵandaı, azamatsha N.J. jáne B.Z. tas laqtyryp, ákimdiktiń temir qorshaýyna shyǵyp, bir mezgilde balaǵat sózder aıtqan», dedi polısııa departamentiniń baspasóz qyzmeti.
Ustalǵan áıelderge qatysty Qylmystyq kodekstiń 272-babynyń 2-bóligi «Jappaı tártipsizdikke qatysý» boıynsha tergeý júrgizilip jatyr.
«Qazirgi ýaqytta eki áıel de qylmystyq áreketterin tolyq moıyndady. Densaýlyqtary men qamqorlyǵynda kámeletke tolmaǵan balalary bar ekenin eskere otyryp, negizgi jaza úıqamaqqa aýystyryldy», dedi polıseıler.