Bilim jáne ǵylym mınıstrliginiń keńeıtilgen alqa otyrysynda Úkimet basshysynyń orynbasary Eraly Toǵjanov 43 memleket otandyq vaksınany alýǵa daıyn ekenin aıtty, dep jazady Egemen.kz.
«Qazaqstandyq ǵalymdardyń tabysy – Bıologııalyq qaýipsizdik máseleleri jónindegi ǵylymı-zertteý ınstıtýtynyń koronavırýsqa qarsy QazVac vaksınasyn ázirleýi. Búgingi kúni alǵa jyljý bar. BSL-3, BSL-4 qurylysy júrgizilip jatyr», dedi Úkimet basshysynyń orynbasary.
Eraly Toǵjanov bul jumysty atqarýda Bilim jáne ǵylym mınıstrliginiń róli óte zor ekenin aıtty.
«Eldiń atyn shyǵarǵan joba ekenin barlyǵymyz jaqsy bilemiz. Qazaqstan 6 memlekettiń ishinen 5-shi bolyp óziniń vaksınasyn shyǵardy. Bul – úlken jetistik. Sol sebepti ǵalymdarǵa rahmetimizdi aıtamyz. Ary qaraı da jumys kóp. Olardyń aldyna qoıylǵan tapsyrma da bólek. Qazir 43 memleket bizdiń vaksınamyzdy alýǵa daıyn. Kezdesýlerde «Pfizer qaıda?» dep suraqty jaýdyrady. О́zimizdiń vaksınanyń sapasy jaǵynan kem emes – tıimdiligi 86-ten 92%-ǵa teń. Qazaqta «qolda bardyń qadiri joq» degen maqal bar. Kóbisi basqa eldiń vaksınasy kerek dep aıtady. Al ózimizdiń vaksına týraly bireýi de sóz qozǵamaıdy. О́zimizdi ózimiz aıtpaǵanda, kim aıtady», dedi Eraly Toǵjanov.