«Kishkentaı Gerkýles»

О́ziniń alǵashqy tabysta­ryna Naým Bolgarııanyń týy as­tynda óner kórsetken kezderi qol jetkizdi. Biraq tegi túrik bolǵandyqtan, ol únemi óziniń tarıhı otanyna oralýdy ańsaı­tyn. Sodan 1986 jyly Mel­býrnde ótken jarysta qonaq­úıden qashyp shyǵyp, birden Túr­kııaǵa tartty. Eki dúrkin álem chempıonynan aıyrylǵan bolgarııalyqtar Halyqaralyq aýyr atletıka federasııasyna shaǵymdanyp, ótemaqy retinde 1 250 000 AQSh dollaryn talap etti. Ol kezde bul óte kóp aqsha edi. Desek te olardyń bul óti­nishi qanaǵattandyrylyp, asqan daryn ıesi halyqaralyq arenada Túrkııanyń namysyn qorǵaý múmkindigine ıe boldy.

Anadoly eline kelgen bette ol birden óz esimin Naım Súleı­manoǵly dep ózgertti. Odan keıin-aq kóptegen tolaǵaı tabysqa qol jetkizdi. О́ziniń sporttyq karerasynda Naım úsh dúrkin Olımpıada chempıony atandy. Atap aıtsaq, 1988 jyly Seýl, 1992 jyly Barselona jáne 1996 jyly Atlantada ótken ǵalamdyq oıyndarda aldyna jan salmady. Sóıtip, onyń esimi úsh dúrkin Olımpııa oıyn­darynyń jeńimpazy atanǵan tuń­ǵysh ziltemirshi retinde tarıh­­ta qaldy. 1985-1995 jyldar ara­lyǵynda ótken álem chem­pıo­nattarynda jeti márte top jar­dy. Bes ret Eýropa birin­shiliginde qarsylas shaq keltir­medi. Álem kýbogyn úsh márte utyp, so­sıalıstik baǵyttaǵy mem­leketterdiń basyn qosqan «Dos­tyq» dodasynda da dara shyqty.

Súleımanoǵly 2000 jyly Sıdneıde alaýy tutanǵan Olım­pııa oıyndarynda da boı kórsetti. Biraq 33 jastaǵy ardager aýyr atlettiń jasyl qur­lyqta baǵy janbady. Sodan keıin ol úlken sporttan qol úzip, Túrkııa parlamentiniń depýtaty boldy. Basqa da qoǵamdyq jumystarǵa belsene aralasty. О́kinishke qaraı, «Kishkentaı Gerkýles» atanǵan ataqty sport­shynyń ómiri qysqa boldy. 2017 jyldyń 18 qarashasynda Naım baýyr sırrozy dertine ushyrap, fánıden baqıǵa attandy. Dańqty aýyr atlet nebári 50 jyl ǵumyr keshti.

Aýyr atletıka tarıhynda Súleımanoǵlydan keıin taǵy úsh apaıtós Olımpııa oıyndarynda úsh ret bas júldeni oljalady. Olar – túrkııalyq Halıl Mýtlý men qos grekııalyq Dımas Pırros jáne Kahı Kahıashvılı. Biraq álem chempıonattaryndaǵy jetistikteri boıynsha olar­dyń eshqaısysy bizdiń keıip­kerimizben teńese almaıdy. Atalǵan jarysta Naım jeti márte altyn tuǵyrǵa kóterilse, Halıl bes jáne Dımas pen Kahı úsh retten sol belesti ba­ǵyn­dyrdy. Sondyqtan da osy sport túri tarıhyndaǵy eń ataqty sportshy dep Súleı­ma­noǵlyny atasaq esh qate­lespeımiz. Sonymen qatar Túr­kııa tarlanbozynyń 46 ret álem rekordyn jańartqanyn da aıta ketken jón.