Nur-Sultan qalasynyń ákimi Alaı Kólginov óziniń Instagram-daǵy paraqshasynda bıyl 300-den astam otbasy elordadaǵy apatty úılerden kóshiriletinin habarlady, dep jazdy Egemen.kz.
«Qala turǵyndarynyń úı jaǵdaıyn jaqsartý maqsatynda jumys istep jatyrmyz. Bul áleýmettik páterlerdiń qurylysy, qoljetimdi jeńildikter qarastyrylǵan turǵyn úı baǵdarlamalaryn iske qosý, uzaq qurylystardy aıaqtaý. Biraq taǵy bir bóligi bar - bul apatty úılerdi buzý. Tozýǵa baılanysty mundaı úılerde shatyr aǵyp, irgetas tógile bastaıdy, elektr symdary, káriz jáne máseleler únemi týyndaıdy. Úılerdiń salynǵan jylyn eskere otyryp, pesh páterlerdiń ishinde, al dárethanalar kóshede bolatyn kóp páterli úıler áli de bar. Osy jyly apatty úılerden 300-den astam otbasyn kóshirýdi josparlap otyrmyz. Búgin apatty jaǵdaıdaǵy eki úıdiń turǵyndarymen kezdestim. Bul Saryarqa aýdanyndaǵy Dúkenuly, 21 meken-jaıynda ornalasqan bes qabatty jataqhana. Biz dál bir jyl buryn osy úıdiń turǵyndarymen kezdesip, barlyq máselelerdi talqyladyq. Biz ony buzamyz. Máslıhatta bul sheshim qoldaý tapty, osy jylǵa arnalǵan buzý josparyna engizildi», dep jazdy qala ákimi.
Ol, sondaı-aq, Baıqońyr aýdanyndaǵy Ál Farabı dańǵyly, 27 meken-jaıy boıynsha ornalasqan apattyq úıdiń turǵyndarymen de kezdesti.
«Bul úıdiń tozýy 75% quraıdy. Úı apatty dep tanyldy, ol da buzý tizimine engizilgen. Turǵyndar barlyq qujattardy retke keltirýi qajet. Ár páterde týyndaǵan máseleler qaralady. Sońǵy úsh jylda apatty úılerden 700-ge jýyq otbasy kóshirildi. Sondaı-aq, turǵyn úı keshenin jóndeý, lıftilerdi aýystyrý, uzaq qurylys jumystaryn aıaqtaý boıynsha jumystar júrgizemiz. Memleket basshysynyń tapsyrmasy boıynsha jeńildetilgen qoljetimdi turǵyn úı qurylysynyń kólemi aıtarlyqtaı ulǵaıdy», dep jazdy elorda ákimi.