«MAEK-Qazatomónerkásip» qyzmetkerleriniń eńbekaqy kólemi 30%-ǵa artatyn boldy. Bul jaıynda «MAEK-Qazatomónerkásip» JShS bas dırektory T. Esentúgelov óz úndeýinde málimdedi, dep habarlaıdy Egemen.kz.
Aımaqtyq Mangystaumedia.kz saıtynda keıbir aıtýly merekelerge syıaqy tóleý suraqtary sheshimin tapqany jaıly habarlanǵan.
T. Esentúgelov óz úndeýinde jumysshylardyń kótergen máselesi aldaǵy ýaqytta qaralatynyn tilge tıek etti.
«Sońǵy 2 kún «MAEK-Kazatomónerkásip» JShS úshin ońaı bolǵan joq. О́ndiris salasyndaǵy jumysshylar tarapynan aıtylǵan jyldar boıy qordalanǵan máselelerdi bir kúnde sheshý múmkin emes. Osyǵan oraı aldaǵy ýaqytta osy máselelerdi tolyqtaı sheshý baǵytyndaǵy jumystar Energetıka mınıstrligi, Mańǵystaý oblysynyń ákimdigimen birlese otyryp sheshiletin bolady», dedi ol.
Sondaı-aq úndeýde kásiporyn basshylyǵy barlyq qyzmetkerlerge óz jumys ornyna oralýdy usynady.
«Ýáde etilgendeı, eshkim óz talaptary úshin qýdalanbaıdy. Budan basqa, mundaı qolaısyz qatynastardy boldyrmaý úshin basshylyq pen óndiristik personal arasynda turaqty tikeleı baılanys ornatý josparlanýda», dedi T. Esentúgelov.
Eske sala ketsek, jaqynda «MAEK-Kazatomónerkásip» JShS qyzmetkerleri eńbekaqyny 100% arttyrý, memlekettik merekelerge syıaqy taǵaıyndaý jáne taǵy basqa eńbek jaǵdaılaryn jaqsartý máseleleri boıynsha mıtıngke shyǵyp, jumysty toqtatqan bolatyn.