QR Premer-Mınıstri Álıhan Smaıylov О́zbekstanǵa jumys sapary aıasynda О́R Prezıdenti Shavkat Mırzıeevpen kezdesip, О́R Premer-Mınıstri Abdýlla Arıpovpen kelissóz júrgizdi, dep jazady Egemen.kz QR Premer-Mınıstriniń baspasóz qyzmetine silteme jasap.
Álıhan Smaıylov Shavkat Mırzıeevpen kezdesý barysynda Qazaqstan men О́zbekstan arasyndaǵy ekijaqty qarym-qatynas ózara senimge jáne túsinistikke negizdelgen strategııalyq seriktestik pen odaqtastyqtyń jarqyn kórinisi ekenin atap ótti.
«Sizdiń ótken jyldyń jeltoqsan aıynda Qazaqstanǵa jasaǵan memlekettik saparyńyz Qazaqstan men О́zbekstannyń keń aýqymdy yntymaqtastyǵyn damytýǵa úlken serpin berdi. Eki eldiń úkimetteri Sizdiń jáne QR Prezıdenti Qasym-Jomart Kemeluly Toqaevtyń arasynda qol jetkizilgen ýaǵdalastyqtardy naqty iske asyrý maqsatynda belsendi jumys istep jatyr. Bizdiń odaqtastyq qatynastarymyzdyń qýatty ári ornyqty ekonomıkalyq platformasyn qurýǵa erekshe kóńil bólinip otyr», dedi Á. Smaıylov.
QR Premer-Mınıstri ózara yntymaqtastyqtyń damý qarqyny joǵary ekenin atap ótti.
О́zbekstan – Qazaqstannyń Ortalyq Azııadaǵy negizgi saýda seriktesi. 2021 jyldyń qorytyndysy boıynsha ekijaqty saýda kólemi 33%-ǵa artyp, $4,3 mlrd qurady. Taıaý jyldary atalǵan kórsetkishti $5 mlrd-qa deıin ulǵaıtyp, orta merzimdi perspektıvada $10 mlrd-qa jetkizý josparda bar. Qazaqstan men О́zbekstanda 3 myńǵa jýyq birlesken kásiporyn jumys isteıdi.
QR Premer-Mınıstri mashına jasaý, jeńil ónerkásip jáne óńdeýshi sektordyń basqa da salalaryndaǵy Qazaqstan-О́zbekstan yntymaqtastyǵynyń joǵary serpinin atap ótti. Avtomobıl jasaýda, aýyl sharýashylyǵy tehnıkasy óndirisinde jáne toqyma salasynda 5 birlesken joba iske asyrylyp jatyr. Qurylys ındýstrııasy men mashına jasaýda $365 mln jýyq somaǵa 7 joba pysyqtalýda.
Elder arasynda saýda-ekonomıkalyq yntymaqtastyq jónindegi prezıdentterdiń arnaıy ókilderiniń tetigi engizildi. Eki eldiń shekarasynda «Ortalyq Azııa» halyqaralyq ónerkásiptik kooperasııa ortalyǵyn qurý jobasyn iske asyrý boıynsha jumystar atqarylyp jatyr.
Úkimet basshysy О́zbekstan Respýblıkasynyń Premer-Mınıstri Abdýlla Arıpovpen kelissózi barysynda saýda-ekonomıkalyq, ınvestısııalyq, sý-energetıkalyq, tranzıttik-kólik, qurylys, aýyl sharýashylyǵy, toqyma, avtomobıl jasaý, mádenı-gýmanıtarlyq jáne basqa da salalardaǵy yntymaqtastyqty odan ári damytýdyń kóptegen máseleleri talqylandy.
Syrdarııa ózeni basseınindegi sý sharýashylyǵy jaǵdaıyna jáne Qazaqstan Respýblıkasynyń ońtústiktegi óńirlerindegi sýarmaly jerlerdi vegetasııalyq kezeńde sýmen qamtamasyz etýge erekshe nazar aýdaryldy.
Sapar qorytyndysy boıynsha aýyl sharýashylyǵy salasynda orta merzimdi perspektıvaǵa arnalǵan ekijaqty yntymaqtastyqty jandandyrý jónindegi jol kartasyna qol qoıyldy.
«Azyq-túlik kelisim shart korporasııasy» UK» AQ ózbek tarapyndaǵy áriptesimen О́zbekstan Respýblıkasynan kókónis ónimderi men kartopty satyp alýǵa shekti kelisimshart jasasty.
Eki eldiń isker toptarynyń ókilderi mashına jasaý, AО́K jáne logıstıka salalarynda jalpy somasy $661 mln quraıtyn birqatar kommersııalyq qujatqa qol qoıdy.
Tashkent qalasyna sapary aıasynda QR Premer-Mınıstri ónerkásiptik, tehnıkalyq, elektrondyq, qurylys jáne turmystyq ónimder shyǵaratyn «Tehnopark» óndiristik aımaǵynyń jumysymen tanysty.