Prezıdenttiń tóraǵalyǵymen ótken Qaýipsizdik Keńesiniń shuǵyl keńesinde «qasiretti qańtar» oqıǵasyna qatysty máseleler nazardan tys qalǵan joq, dep habarlaıdy Egemen.kz.
Bas prokýror Ǵızat Nurdáýletov «qasiretti qańtar» oqıǵasyna qatysty tergeý jumystarynyń barysy týraly baıandady. Ol óz sózinde qazirgi ýaqytta 3024 qylmystyq is boıynsha tergeý amaldary júrgizilip jatqanyn tiline tıek etti. Arnaýly prokýrorlardyń basshylyǵymen vedomstvoaralyq tergeý toby jappaı tártipsizdikter men terrorlyq aktiler boıynsha 177 isti qarap jatqanyn da aıtyp ótti.
Ustalǵandardyń tulǵalary anyqtalǵan soń, sondaı-aq densaýlyq jaǵdaılaryna baılanysty jáne basqa da materıaldar boıynsha 109 azamattyń qamaýǵa alý jazasy ketip qalmaý jónindegi qolhatpen jáne jeke kepildik berýmen almastyrylǵan. Prokýrorlar azamattardyń tártipsizdikke qatysy bar ekeni dáleldenbegenin negizge ala otyryp, taǵy da 103 adamdy bosatqan. Ustalǵandardy azaptaý týraly árbir habarlama jiti tekserilgen. Jalpy prokýratýraǵa ustalǵandar tarapynan 305 shaǵym túskeni belgili boldy. Quqyq buzýshylyqqa qatysty 62 shaǵym dáıektiń joqtyǵyna baılanysty rastalmaǵan. Azaptaý jáne bıligin asyra paıdalaný deregi boıynsha 170 qylmystyq is qozǵalǵan.
«Árbir isti egjeı-tegjeıli tekseremiz jáne bultartpas dálelder bolǵan jaǵdaıda ǵana kinálilerdi jaýapkershilikke tartamyz», dedi Bas prokýror shuǵyl keńeste óz oıyn bildirip.