Densaýlyq saqtaý basqarmasynyń málimetinshe, búginge deıin óńirde 12 jastan asqan 8 myńǵa jýyq oqýshy Pfizer vaksınasynyń birinshi kezegin aldy. Ekinshi komponentti vaksına ektirgen bes myńnan astam bala bar.
Oblys mektepterinde balalar men ata-analarǵa qaýipti indettiń aldyn alýdyń jalǵyz joly vaksına qabyldaý ekenin túsindirý jumystary áli de júrip jatyr. Bul másele tóńireginde buǵan deıin onlaın rejimde dárigerler, ustazdar men ata-analar qatysqan birneshe ret jalpy mekteparalyq jınalystar ótken. Qazir sanıtarlyq-epıdemııalyq dárigerler jeke-jeke bilim oshaqtaryna arnaıy baryp, ata-analarǵa vaksına qabyldaýdyń mańyzy men onyń paıdasy, artyqshylyqtary týraly túsindirýde. Mundaı jumystar nátıjesiz emes, áý basta ekpeden úzildi-kesildi bas tartqan ata-analardyń birazy mán-jaıdy endi túsine bastaǵan. Máselen, taıaýda Qostanaıdaǵy №115 mektepte ata-analarynyń qatysýymen on shaqty oqýshy vaksına qabyldady.
– Búgin bizde 12 ata-ana balalaryna Comirnaty Pfizer vaksınasyn ektirý týraly ótinish bildirdi. Oqýshylar ekpeni mektep qabyrǵasynda, arnaıy egý bólmesinde alyp jatyr. Buǵan deıin 11 balaǵa egildi. Jalpy, jyl basynan beri 19 oqýshy koronavırýspen aýyryp shyqty. Juqpaly derttiń jolyn kesý úshin bizge ujymdyq ımmýnıtet qalyptastyrý qajet. Muny ata-analardyń da túsine bastaǵany qýantady, – dedi mektep medbıkesi Gúlbaný Jumabaeva.
Vaksına alyp shyqqan 11 synyp oqýshysy Ámına Bazarbaeva qasyna anasyn ertip kelipti.
– Qazir qalada tumaý órship tur. Aınalamyzdaǵy týystarymyz, kórshi-qolań, tanystarymyzdyń bári
aýyryp shyqty. Sondyqtan ózimiz aqyldasyp, vaksına qabyldaý kerek dep sheshtik. Joldasymyz ekeýimiz ekpeniń úsh komponentin aldyq. Qyzym bıyl 11 synypty bitirgeli otyr. Vaksına balaǵa da artyq etpeıdi. Qaıta paıdasy tıedi. Birinshiden ımmýnıtet qalyptastyrady. Bul sumdyq aýrýdy tek vaksına arqyly jeńip shyǵamyz, – deıdi Ámınanyń anasy Jańylhan Múslimova.
Qostanaı oblysy