Fýtboldan Qazaqstan ulttyq quramasy jeksenbi kúni ishki birinshilikte baq synaıtyn komandalardyń legıoner fýtbolshylarymen joldastyq match ótkizdi. Túrkııanyń Antalııa qalasynda kezekti oqý-jattyǵý jıynyn ótkizip jatqan Talǵat Baısýfınov shákirtteri bul oıynda 2:1 esebimen jeńiske jetti.
Aqpan aıynyń basynda Qazaqstan fýtbol federasııasynyń baspasóz qyzmeti Ulttar lıgasy aıasynda Moldova quramasymen bolatyn oıynǵa daıyndyq retinde QPL klýbtarynyń legıonerleri komandasymen joldastyq match ótetini týraly habarlady. Resmı málimdemeden keıin keıbir fýtbol jankúıerleri QFF-nyń bul sheshimin túsinbeı: «Legıonerlermen oınaǵansha, nege ózge eldiń quramalarymen match ótkizbeıdi? Federasııanyń munysy nesi?» dep tańdanys bildirgen edi. Keıinnen QFF muny aqpan aıynda FIFA-nyń resmı kúnderi joq ekenin, sondyqtan ózge quramalarmen match ótkizý múmkin emes ekenin kóldeneń tartqan edi.
Jalpy, bul jerde mańyzdysy kimmen oınaýda emes, Qazaqstan quramasynyń aldaǵy jaýapty oıynǵa daıyndyǵy, qandaı taktıka ustanatyny jáne jańa fýtbolshylardy synaqtan ótkizip alýda edi. Dál osy jaǵdaı týraly fýtbol sarapshysy Aıdyn Qojahmet óziniń telegramm arnasynda bylaı dep jazdy: «Kez kelgen árekettiń maǵynasy jáne túpki nátıjesi bolýy kerek. Eger sizge birdeńe kerek bolsa, soǵan qol jetkizý úshin bárin jasaısyz. Iаǵnı sizde qandaı da bir maqsat bolý kerek. Alaıda biz Qazaqstan quramasynyń keshegi oıyndaǵy túpki maqsatyn túsine almadyq. Eger bapkerler quramanyń jaqyn bolashaqtaǵy rezervin tekserip kórgisi kelgen bolsa, bul bólek áńgime edi. Sondaı-aq mańyzdy oıyn aldyndaǵy joldastyq matchqa sheteldik klýbtarda óner kórsetetin Baqtıer Zaınýtdınov, Marat Bystrov, Alekseı Shetkın, Georgıı Jýkov, Stas Pokatılov, Iаn Vorogovskıı, Igor Shaskıı jáne taǵy basqa fýtbolshylar qatyspaǵan soń muny daıyndyq dep te aıtýǵa kelmeıdi. Jalpy, keshegi oıyn maǵynasyz match boldy». Bul pikirmen kelisýge de, kelispeýge de bolady.
Legıonerlermen ótken joldastyq oıynda Qazaqstan quramasy 2:1 esebimen jeńiske jetti. Jalpy, shetten kelgenderdiń sheberligi jergilikti fýtbolshylardan bir bas joǵary bolýǵa tıis. Biraq bul oıynda ondaı artyqshylyq baıqalmady. Al kezdesýge kelsek, birinshi taımda jerlesterimizden Ashat Taǵybergen (5-mınýt) men Oralhan О́mirtaev (21) mergendigimen kózge tússe, ekinshi taımda qarsylastardan «Qyzyljardyń» belorýssııalyq shabýylshysy Kırıll Sıdorenko gol soqty.
Ulttyq quramanyń oıyndar tarıhyna zer salar bolsaq, bul Qazaqstan fýtbolyndaǵy tuńǵysh jaǵdaı emes ekenin ańǵaramyz. 2012 jyldyń tamyzynda Almatydaǵy Ortalyq stadıonda da Mıroslav Beranek baptaǵan ulttyq quramamyz sol kezdegi QPL legıonerler komandasymen kezdesken edi. Tartysty ótken matchta 4 gol soǵylyp, 15 myń jankúıerdiń kóńilinen shyqqan oıyn bolǵan-tyn.
Qazaqstan – Legıonerler arasyndaǵy oıynnyń resmı hattamasy:
Qazaqstan quramasy: qaqpashy – Muhamedjan Seısen, qorǵaýshylar – Dmıtrıı Shomko, Temirlan Erlanov, Aleksandr Marochkın, Ádilbek Jumahanov, Baǵdat Qaıyrov, jartylaı qorǵaýshylar – Ashat Taǵybergen, Serikjan Mujyqov (kapıtan), Arman Keńesov, shabýylshylar – Oralhan О́mirtaev, Abylaıhan Jumabek.
Ekinshi taımdaǵy quram: qaqpashy – Bekhan Shaızada, qorǵaýshylar – Sergeı Malyı, Dinmuhamed Qashken, Saǵadat Tursynbaı, Maqsat Táıkenov, Álibek Qasym, Nurlan Daıyrov, jartylaı qorǵaýshylar – Islambek Qýat, Elhan Astanov, shabýylshylar – Stanıslav Basmanov, Abat Aıymbetov.
Legıonerler quramy: qaqpashy – Marko Mıloshevıch («Astana»), qorǵaýshylar – Evgenıı Kozlov («Qyzyljar»), Alı Gadjıbekov («Aqsý»), Taras Bondarenko («Kaspıı»), Brýno («Ordabasy»), jartylaı qorǵaýshylar – Sergeı Tıhonovskıı («Qyzyljar»), Ratı Arzadashvılı («Aqjaıyq»), Shafık Tıgrýdja («Kaspıı»), shabýylshylar – Eıder Kosta («Taraz»), Sımonas Ýrbıs (klýbsyz), Rafael Olıveıra («Qyzyljar»).
Qosalqy quram: qaqpashy – Sergeı Lıtovchenko («Maqtaaral»), qorǵaýshylar – Islam Jılov («Aqsý»), Plamen Dımov, Vladımır Gınıaıtıs (ekeýi de – klýbsyz), jartylaı qorǵaýshylar – Todor Petrovıch («Atyraý»), Paro Iýsýf (klýbsyz), Nıkıta Malıarov («Aqtóbe»), Anatolıı Katrıch («Atyraý»), Rasambek Ahmatov («Maqtaaral»), shabýylshylar – Kırıll Sıdorenko («Qyzyljar»), Koroma. Bas bapker – Andreı Karpovıch.
Aıta keteıik, naýryzdyń sońynda Qazaqstan quramasy Ulttar lıgasy aıasynda Moldovamen elektik oıyn ótkizedi. Sol matchta jerlesterimiz jeńiske jetse, S lıgadaǵy ornyn saqtap qalady, eger jeńilip qalsa, D lıgaǵa túsip qalady.